«Қарсыласты жақсы білемін»: Вайсс – Қазақстан құрамасы, «Ақтөбе» және Исламхан туралы

Словакия құрамасының бас бапкері Владимир Вайсс матч алдындағы баспасөз мәслихатында Ұлттар лигасы аясындағы Қазақстанға қарсы алдағы ойыннан күтетін үміттерімен бөлісті, деп хабарлайды ASnews.kz.

Қазақстандық футболдың дамуы туралы

«Сіздерді көргеніме қуаныштымын, мені үлкен жылулықпен еске алатындарыңызды білемін. «Қайратқа», Қайрат Боранбаевқа, қазақстандық футболға және мен сол жақта бірге жұмыс істеген адамдарға деген құрметім шексіз. Соңғы он жылда Қазақстан құрамасы үлкен жолдан өтті, бұған Қайрат Советұлының сіңірген еңбегі зор – қазір ұлттық командада клубтың көптеген түлектері бар. Бұл сол кездегі біздің басты қарсыласымыз болған «Астана» және «Ақтөбе», «Ордабасы», «Қайрат» ойыншыларының жақсы қоспасы. Мен Қазақстанды әрдайым жылы лебізбен еске алатын боламын, бірақ ертең олар – біздің қарсыласымыз».

Қазақстан құрамасының тактикасы туралы

«Мен қазақстандық құраманы, олардың соңғы нәтижелерін, бұрынғы және қазіргі бапкерлерін өте мұқият қадағалап отырмын. Жүйе шамамен бұрынғыдай қалды – олар 4-2-3-1 голландиялық жүйесімен ойнайды. Бапкер ауысты, шабуыл шебіндегі бірнеше ойыншы өзгерді. Қазір жарақат алған Дастан Сәтпаев жоқ, нағыз орталық шабуылшы жоқ. Мен бұрынғы ойыншыларым – Қуатты, Исламханды, сондай-ақ «Қайраттың» түлегі саналатын және мен онда жұмыс істеген кезде мүлде бала болған Нұралы Әліпті көргеніме қуанышты боламын. Бірақ қайталап айтайын, қазақстандық футболға деген зор құрметіме қарамастан, ертең олар – менің қарсыластарым».

Өткен жеңілістер мен алдағы ойын туралы

«Осыдан төрт жыл бұрын Словакия Қазақстаннан қатарынан екі рет жеңіліп қалды. Бұдан қорытынды жасау керек, өйткені ол нәтижелер кездейсоқ болған жоқ. Қазақстан – жақсы дайындалған, ұйымдасқан команда. Ертең қиын ойын болады деп күтемін. Бірақ сонымен қатар класс пен сапа біздің жағымызда екенін түсінемін. Бүгін мен – Словакия құрамасының бапкерімін, ал менің міндетім – өз футболшыларыма сенімділік ұялатып, қарсылас құрамындағы осал тұстарды табу. Бұл – менің жұмысымның бір бөлігі. Мен қазақстандық жігіттердің барлығын дерлік өте жақсы білемін. Барлығы алаңда жеке және командалық әрекеттердің арқасында шешілетін болады».

Еске сала кетейік, Словакия және Қазақстан құрамалары арасындағы Ұлттар лигасының екінші тур матчы 29 қыркүйекте Кошицеде өтеді. Бастапқы ысқырық Астана уақытымен 23:45-те естіледі.

Бұған дейін, 2022 жылғы Ұлттар лигасының маусымында командалардың жолы түйіскен болатын: ол кезде Қазақстан құрамасы словактарды екі рет сенсациялық түрде жеңген еді (Трнавадағы сырт алаңда 1:0 және Астанадағы өз алаңында 2:1).