«Қазақтар – нағыз жауынгерлер»: Джон ван ’т Схиптің ұлттық құраманың бас бапкері ретіндегі алғашқы сөзі

Қазақстан ұлттық құрамасының жаңа бас бапкері Джон ван ’т Схип жанкүйерлер мен БАҚ өкілдеріне үндеу жасап, өз тағайындалуына қатысты алғашқы әсерлерімен бөлісті, деп хабарлайды ASnews.kz.

«Мақтана алатындай команда құрғымыз келеді»

«Сәлем, Қазақстан!

Ең алдымен, ҚФФ-ға осы жерге келіп, бапкерлер штабымен бірге команданың дамуына көмектесуге мүмкіндік бергені үшін шын жүректен алғыс айтқым келеді. Мен бұл сынақты үлкен мәртебемен қабылдаймын және алдағы апталар мен айлардағы жұмысқа зор ынтамен қараймын.

Алда көп еңбектену керек, бірақ мен қазақстандықтардың ерінбей еңбек етуді сүйетін әрі оны білетін нағыз жауынгерлер екенін білемін. Біздің міндетіміз – осы еңбекқорлықты дұрыс арнаға бағыттау, бірлігі жарасқан ұжым қалыптастыру және қалаған нәтижелерге қол жеткізу. Ең бастысы – бәріміз мақтана алатындай ұлттық құрама құрғымыз келеді.

Бапкерлер штабымен және басшылықпен бірлескен жұмысымызға сенімдімін, біз команданы және ішкі чемпионатты мүмкіндігінше тезірек егжей-тегжейлі зерттеуге тырысамыз, өйткені ресми матчтар өте жақын қалды. Қазақстан футболы соңғы жылдары айтарлықтай өрлеу жасады және біз бұл жолды әрі қарай жалғастыруға тиіспіз.

Барлық үміткерлерді назарда ұстаймын: жас ойыншыларды да, дәл қазір шақыртуға лайықтыларды да. Алдағы Ұлттар лигасының матчтарына дайын және оңтайлы бабында тұрған футболшылар алаңға шығады.

Іске кірісуге асығып отырмын: алда көптеген сапарлар, ойындарды қарау, жаттығу жиындарын жоспарлау және футболшылармен тілдесу күтіп тұр. Рақмет!», – деді маман.

Нидерландық маман Қазақстан құрамасын Ұлттар лигасының кезекті циклі басталар алдында басқарды.

Ван ’т Схиптің бапкерлер штабына отандық мамандар кірді: Нұрбол Жұмасқалиев, Елдос Ахметов, Юрий Новиков, Вадим Боровский және Тимур Құсаинов.

ҚФФ уәжі: федерация Ван ’т Схипті тағайындар алдында не нәрсеге сүйенді

Джон ван 'т Схип: өмірбаяны, толық ақпарат, жалақысы, жеке өмірі. Қазақстан ұлттық құрамасының жаңа бас бапкері