«Ахматтың» бас директоры – Самородовтың «Спартакқа» ауысуы туралы: бұл трансфер жоспарда жоқ

Грозныйдың «Ахмат» клубының бас директоры Ахмед Айдамиров ASnews.kz сайтына берген сұхбатында қазақстандық вингер Максим Самородовтың мәскеулік «Спартакқа» ауысуы мүмкін деген ақпаратқа қатысты пікір білдірді.

«Біз әртүрлі қауесеттерге пікір білдіруден шаршадық. Максим Самородовтың трансфері біздің жоспарымызда жоқ. Қалғанының бәрі – бос сөз. Ешқандай ұсыныс түскен жоқ. Біз барлық футболшыларымызға: «Егер бірінші кезекте клубтың, содан кейін барып ойыншының көңілінен шығатын ұсыныс түссе, біз оны қарастырамыз» деп айтамыз. Ал қалған әңгімелердің бәрі – пікір білдіруге де, егжей-тегжейлі талқылауға да тұрмайтын қауесеттер», – деді Айдамиров.

Бұған дейін спорт журналисі Анар Ибрагимов Самородовтың «Спартакқа» ауысуы жүзеге аспай қалуы мүмкін екенін хабарлаған болатын. Оның мәліметінше, «Ахмат» қатаң позиция ұстанып отыр және 24 жастағы қазақстандық үшін сұралған соманы 10 миллион еуродан төмендеткісі келмейді. Мәскеулік клубтың вингер үшін ұсынған 4 миллион еуросы Станислав Черчесовтың командасы үшін аздық еткені және қос клуб арасындағы келіссөздер әлі де ортақ мәмілеге әкелмегені атап өтілді.

Еске сала кетейік, өткен маусымда «Ахмат» вингері Максим Самородов 34 матчқа қатысып, бес гол соқты және 10 нәтижелі пас берді.

«Ахмат» пен Косово құрамасының бұрынғы шабуылшысы Бернард Бериша Самородовтың болашағына баға берді.