«ҚФФ-ны емес, Adidas-ты кінәлау керек»: сарапшы Қазақстан құрамасының жаңа формасы туралы пікір білдірді

Яндекс компаниясының спорттық маркетинг жөніндегі жетекші менеджері және «Қайраттың» бұрынғы қызметкері Әлім Раздықов ASnews.kz сайтына берген сұхбатында Қазақстан құрамасының жаңа формасына баға берді.

Adidas кінәлі

«Ең алдымен, неміс өндірушісінің сапалы киімдерінде жаттығатын футболшылар үшін қуаныштымын. Әсіресе, олардың Adidas пен Nike сияқты алпауыттарды жақсы көретінін ескерсек.

Ал егер дизайн үшін біреуді сынағымыз келсе, онда осы уақыт ішінде ерекшелене алмаған және сток үлгілерін жаңарта алмаған брендті кінәлау керек. Қазақстан құрамасы басқа тоғыз қауымдастықпен бірге UEFA Kit Assistance Scheme бағдарламасы бойынша экипировка алады.

Бәлкім, Adidas 15 жыл бұрынғы ретро-тұжырымдамаға сілтеме жасағысы келген шығар немесе Errea сияқты креативке еркіндік бермеген болуы мүмкін. Ол кезде отандық дизайнерлер бірегей өрнек жасап шыққан еді», – деді маман.

Өз көзімізбен көрген дұрыс

«Хорватияның «шақпақ» өрнектерімен салыстырудың қажеті жоқ – сары формадағы жіңішке жолақтар Қазақстанның болмысын көрсетпейді. Қолжетімді нұсқалардың ішінен таңдауға тура келген сияқты. Бұл форма жанкүйерлердің есінде қалғанын қалаймын, ал ол тек Еуропа немесе әлем чемпионатына шыққан жағдайда ғана мүмкін болады.

Видео-таныстырылымдағы жасанды интеллект пе? Әлем өзгерді, жасанды интеллект біздің өмірімізге, тіпті экипировка таныстыру сияқты детальдарға да еніп кетті. Дегенмен, алдағы оқу-жаттығу жиындарында бұл формадағы керемет фотоларды көретінімізге сенімдімін – нағыз таныстырылым сол болмақ», – деп толықтырды ол.

Еске салайық, итальяндық Errea брендімен үш жылдық ынтымақтастықтан кейін ҚФФ жаңа жиынтықтарды таныстырды. 2010-15 жылдардағы киімдерге ұқсас болғандықтан, Adidas үлгілері желіде теріс бағаға ие болды.

Маусым айында Талғат Байсуфиновтың шәкірттері жаңартылған формада алғашқы ойындарын өткізеді. Қарсыластар арасында Армения мен Венгрия құрамалары бар.