«Бүкіл команданың ойыны жаман болды»: The Scottish Sun тілшісі Чесноковтың ойыны мен «Хартстың» чемпиондыққа мүмкіндігі туралы

The Scottish Sun басылымының журналисі Роберт Мартин ASnews.kz сайтына берген сұхбатында Қазақстан құрамасының вингері Ислам Чесноковтың соңғы ойынына пікір білдіріп, оның «Хартс» клубының Шотландия чемпионатындағы алтын медальға мүмкіндігін бағалады.

«Исламның «Ливингстонға» қарсы ойыны керемет болмады, бұл шындық, бірақ бүкіл команданың ойыны да аса жақсы болған жоқ, сондықтан олар лиганың басты аутсайдерімен 2:2 есебімен тең түсті. Бірақ кеше «Хартс» «Мотеруэллді» жеңіп, өте маңызды жеңіске қол жеткізді, сондықтан олардың бірінші орынмен аяқтауға әлі де тамаша мүмкіндіктері бар», – деді Мартин.

Естеріңізге сала кетейік, Шотландия чемпионатының 33-турындағы «Хартс» пен «Мотеруэлл» арасындағы кездесу алаң иелерінің 3:1 есебімен жеңісімен аяқталды (Пьер Каборе, Клаудио Брага және Лоуренс Шенкленд гол соқты). Өткен турда негізгі құрамда шыққан Ислам Чесноков бұл жолы қосалқы құрамда қалып, алаңға сол күйі шыққан жоқ. Айта кетейік, 32-турдағы «Ливингстонға» қарсы (2:2) матчта 26 жастағы қазақстандық командадағы ең төменгі бағалардың бірін (5.4) алған болатын. Жалпы осы маусымда ол клуб сапында сегіз ойынға қатысып, бір гол соқты.

Қоса кетейік, 33 турдың қорытындысы бойынша «Хартс» 70 ұпай жинап, турнирлік кестеде жеке дара көш бастап тұр. Енді Шотландия чемпионатында екінші кезең басталады: Чесноковтың командасы жеңімпаздар тобында өнер көрсетіп, қалған бес турда топ-6 қатарындағы клубтармен ойнайтын болады.

WhoScored сарапшысы: Чесноков «Хартсқа» әлі көмектеседі – уайымдаудың қажеті жоқ