Намибия қақпасына гол соққан Вороговский: Комор аралдарымен өтетін ойынға жақсырақ дайындаламыз

Намибияға қарсы жеңісті матчта (2:0) есеп ашқан Қазақстан құрамасының қорғаушысы Ян Вороговский биылғы алғашқы ойыннан алған әсерімен бөлісті, деп хабарлайды ASnews.kz.

«Бұл 2026 жылғы алғашқы халықаралық матчымыз. Жігіттермен көріспегелі көп болды, бәлкім, әзірге өзара түсіністік аздау болар. Небәрі үш тур ойнадық, маусым енді ғана басталды. Келесі ойынға әлдеқайда жақсырақ дайындалып, көп нәрсе сәттірек шығады деп ойлаймын. Қарсыласқа келер болсақ, Намибия футболшылары физикалық тұрғыда қатты ерекшеленеді», – деп атап өтті қорғаушы.

Сондай-ақ футболшы ұлттық құрама сапындағы нәтижелілігі мен жақындарының қолдауы туралы сұраққа жауап берді:

«Құрамадағы алтыншы голым? Өте мақтан тұтамын, бұдан былай да жанкүйерлерімізді қуантуға тырысамын. Барлығы Құдайдың қалауымен: физикалық тұрғыда дайынмын, жарақаттар да айналып өтіп жатыр. Құрама сапында өнер көрсетуге әрқашан қуаныштымын. Отбасым мені қолдайды, матчтарға келіп тұрады – бұл мен үшін қосымша мотивация. Дегенмен, ұлыма көбірек хоккей ұнайды (күледі)», – деп қосты Вороговский.

Қазақстан құрамасы өз алаңында өтіп жатқан FIFA Series турнирін Намибия командасын 2:0 есебімен сенімді түрде жеңуден бастады. Матч 25 наурызда «Астана Арена» стадионында өтті.

Ян Вороговский 12-минутта стандартты жағдайдан кейін қарсылас айып алаңының маңында қайтқан допқа бірінші жетіп, қазақстандықтарды алға шығарды. Ал 79-минутта бұрыштамадан асырылған допты баспен дәл бағыттаған «Астананың» тағы бір қорғаушысы Әлібек Қасым ойынның нүктесін қойды.

Талғат Байсуфиновтің шәкірттері келесі матчын 31 наурызда Комор аралдары құрамасына қарсы өткізеді (бастапқыда жарысқа қатысуды жоспарлаған Кувейт құрамасы бұл додадан бас тартты).

Қазақстан ұлттық құрамасы бас бапкерінің көмекшісі Елдос Ахметов футболшылардың бабы туралы пікір білдірді.