Ұлттық құрама бапкері – Мрынскийдің дебюті жайлы: командамыздың болашақ беткеұстар ойыншысы

Қазақстан ұлттық құрамасы бас бапкерінің көмекшісі Елдос Ахметов Намибияға қарсы ойыннан (2:0) кейін футболшылардың бабы және бас команда сапында алғаш рет алаңға шыққан жас ойыншылар туралы пікір білдірді, деп хабарлайды ASnews.kz.

«Балалардың бәрі дайындалып жатыр, кімнің жақсы, кімнің жаман ойнағанын айту әзірше ерте. Бапкерлер штабы жігіттердің дұрыстайтын тұстарын әлі де көрсетеді. Қазір кейбір ойыншылар тонуста емес шығар, өздерінің ойын ырғағын жоғалтып алды деп айтсам қателеспеймін, өйткені олар өз командаларында көп уақыт ойнап жүрген жоқ. Мұхамеджан Сейсеннің екінші таймда алаңға шығуына келсек, Темірлан Анарбеков жарақат алған жоқ, бұл тек қақпашылар бапкерінің шешімі. Бұл турнир жолдастық кездесулердің орнына жасалып жатқан жарыс қой», – деді Ахметов матчтың жалпы барысы туралы.

Сондай-ақ маман ұлттық құрама сапында дебют жасаған футболшылардың ойынына жеке-жеке тоқталып өтті:

«Александр Мрынскийге келсек, мен ол бала үшін ризамын. Ол – құраманың беткеұстар болашақ футболшыларының бірі, өйткені жасына қарамай, жоғары деңгейде ойнап жүрген жігіт. Ал оның сары қағазына келсек, бұл футболда болып тұратын жағдай. Александр өзі ойын ережесін көп бұзбайтын бала, бірақ сондай эпизод болғасын сары қағаз алып қалды. Еркін Тапаловтың екінші таймда шығуына келсек, бізде осы наурыз айында екі ойын бар. Сол үшін Исламбек Қуатқа кішкене уақыт бердік, келесі ойында бәлкім Еркін негізгі құрамда шығады.

Дамир Мараттың дебютіне келсек, бәрі мүмкін, келесі ойында бастапқы құрамда да шығуы ғажап емес. Қазір кім шығады, кім шықпайды – оны айту ерте. Бірақ бүгінгі ойыны жаман емес. Керемет ойнап жүр деп те айтуға болады», – деп түйіндеді бапкердің көмекшісі.

Намибияға қарсы матчта Қазақстан ұлттық құрамасының сапында бірден үш футболшы дебют жасады: «Қайраттың» оң қанат қорғаушысы Александр Мрынский, сондай-ақ қостанайлық «Тобылдың» жартылай қорғаушылары Дамир Марат пен Жасұлан Жұмашев.

Еске салайық, Қазақстан құрамасы FIFA Series турниріндегі алғашқы ойынында Намибияны 2:0 есебімен сенімді түрде ұтты.