«Жеңістің» экс-бапкері Кенжебектің «Ахматқа» ауысуы туралы: мінсіз маусым өткізеді

«Жеңіс» клубының бұрынғы бас бапкері Акис Вавалис ASnews.kz сайтына берген сұхбатында Ғалымжан Кенжебекпен бірге жұмыс істеген кезі туралы айтып берді.

«Біз бірге үш айдан артық жұмыс істемесек те, Ғалымжан маған ерекше әсер қалдырды. Біз «Жеңісте» оны алып қалғымыз келген, бірақ «Қайраттан» толықтай сатып алуға шамамыз жетпеді. Мен үшін Кенжебек – жоқ жерден жалғыз өзі қауіпті сәт тудыра алатын өте дарынды жігіт. Қазір бәрі оның ортаға ойысып, қақпаның алыс бұрышына бағыттайтын соққыларына сүйсініп жүр. Мұнда бір ерекшелік бар», – деп атап өтті грекиялық маман.

40 жастағы маман қазақстандық вингердің «Ахматты» таңдауына да баға берді:

«Оның қолында қандай ұсыныстар болғанын білмеймін, бірақ оған және Мамукаға (агентіне – еск.) сенім артайық. Сондай-ақ мынаны да ұмытпаған жөн: еурокубоктарсыз-ақ Ресей премьер-лигасы (РПЛ) бәсекеге қабілетті лига болып қала береді. Самородовтың «Ахматқа» ауысқанына өкінбегеніне сенімдімін. Ресейге көшудің тағы бір артықшылығы – тілдік кедергінің жоқтығы. Осылайша Годи (Ғалымжан – еск.) ұжымға тезірек сіңісіп, мінсіз маусым өткізеді және мансабында келесі қадамды жасай алады», – деп қосты ол.

Еске салайық, биылғы жылдың қаңтарында 23 жастағы шабуылшы Ғалымжан Кенжебек грозныйлық клубпен ұзақмерзімді келісімшартқа отырды. Команданы Қазақстан ұлттық құрамасының бұрынғы бас бапкері Станислав Черчесов жаттықтырады.

Вавалис «Жеңіске» 2024-2025 жылдары жетекшілік етті. Грек маманының басшылығымен «елордалықтар» 30 матч өткізіп, сегіз жеңіске жетті, сондай-ақ Лига Кубогының финалына шықты. Оның қазіргі клубы – болгариялық «Монтана».