Литвалық сарапшы Чебуриннің Қазақстан құрамасына келуі туралы: жастарға ешқашан сенім артқан емес

Литвалық комментатор әрі TV3 журналисі Мантас Красницкас ASnews.kz сайтына берген сұхбатында Владимир Чебуриннің жас футболшылармен қалай жұмыс істейтінін айтып берді.

«Чебуриннің жастар құрамасын қалай жаттықтыратынын білмеймін, өйткені бұған дейін оның клубтағы жалғыз мақсаты Литвадағы барлық турнирлерде жеңіске жету болды. Бұл мүлдем екі бөлек дүние. Оның үстіне, «Жальгиристе» ол жас таланттарға сенім артпады.

Керісінше, болашағынан үміт күттіретін жастар маусымнан маусымға резервте қалып қоятын. Чебурин команда 3:0 немесе 4:0 есебімен жеңіп тұрған кездің өзінде оларды алаңға шығармайтын», – деді сарапшы.

Дегенмен Красницкас қазақстандық маманның бір күні Балтық жағалауына қайта оралуы мүмкін екенін жоққа шығармайды:

«Литва футболының есігі ол үшін жабық деп айтуға болмайды. Ұзақ уақыт бойы Владимирді қатты құрметтеді, бірақ соңы бәрін бұзып жіберді. Жанкүйерлер талап еткен кезде кетудің орнына, ол бос сөз сөйлеп, қызметтен кетуге батылы бармады», – деп қосты ол.

Еске салайық, Чебурин Қазақстанның U-21 жастар құрамасының аға бапкері болып тағайындалды. Ол 10 жыл бойы литвалық үш клубты – «Круоя», «Судува» және «Жальгиристі» жаттықтырып, олармен бірге 11 жүлде жеңіп алған.

Айта кетейік, 2025 жылдың тамызында команда Чемпиондар лигасы мен Конференция лигасынан шығып қалғаннан кейін вильнюстік жанкүйерлер 60 жастағы маманның қызметтен кетуін талап еткен болатын.