Шотландиялық сарапшы – Чесноковтың алғашқы голы туралы: маңызды ойыншыға айналып келеді

The Scottish Sun басылымының шолушысы Роберт Мартин ASnews.kz сайтына берген сұхбатында эдинбургтік «Хартс» сапындағы алғашқы голын соққан қазақстандық вингер Ислам Чесноковтың ойынына қатысты пікір білдірді.

«Ол жақсы ойнады, гол соғатын сәтін тамаша пайдаланды, ал қарсылас қорғаушысы соққысын қайтарып қалған тағы бір эпизодта оның сәл жолы болмады. Ол команда үшін маңызды ойыншыға айналып келеді. Оның ойыннан ойынға күшейіп, өзіне деген сенімділігі арта түскенін көріп отырмыз», – деді Мартин.

Еске салайық, Чесноков Шотландия Премьер-лигасының 28-туры аясындағы «Фалкиркке» қарсы матчта 45-минутта гол соғып, көзге түсті. Бұл Исламның Эдинбург клубы сапындағы төртінші матчы ғана: 17 қаңтарда ол жергілікті Кубокта дебют жасап, кейін чемпионатта «Хиберниан» мен «Рейнджерске» қарсы екі ойын өткізген болатын.

Осы жеңістен кейін турнир кестесін бастап тұрған «Хартс» екінші орындағы «Рейнджерстен» бес ұпайға ұзап кетті. Айта кетейік, Шотландияда да Қазақстандағыдай Чемпиондар лигасының іріктеу кезеңіне тек бір команда – турнир жеңімпазы ғана жолдама алады. Өткен маусымда дәл осы сатыда алматылық «Қайрат» шотландиялық «Селтикті» жарыс жолынан шығарып, сенсация жасаған еді.

Бұған дейін ПСЖ мен шотландиялық «Хибернианның» бұрынғы шабуылшысы Франк Джа Джедже Ислам Чесноковқа бірнеше кеңес берді.