Әліп – «Зенит» жанкүйерлерімен қарым-қатынасы туралы: Петербург көшелерінде жиі таниды

Қазақстан ұлттық құрамасының капитаны әрі петерборлық «Зениттің» қорғаушысы Нұралы Әліп ASnews.kz сайтына берген сұхбатында клубтың «Вираж» фан-қозғалысының белсенді жанкүйерлерімен қарым-қатынасы туралы айтып берді.

«Басында жанкүйерлермен көп араласпайтынмын. Белгілі бір уақыттан кейін адамдар мені тани бастады. Мысалы, сауда орталығында кездейсоқ кездесіп қалуымыз мүмкін. «Вираж» жігіттерін бірден тануға болады – көбісі спортшылар. Кездескен сайын қолдау білдіріп жатады: «Нурик – жарайсың, біз саған сенеміз» дейді. Көбінесе мен тұратын аудандағы сауда орталығында кездесіп қаламыз. Қазір мені танитындар қатары артып келеді.

Жігіттермен қарым-қатынасымыз керемет. Стадионға кіру үшін жанкүйерлерге Fan ID керек. Иә, кубок матчтарында Fan ID ережесі жүрмейді – мінберлер лық толады. Жақында Мәскеудегі «Динамоға» қарсы матчта «Зениттің» 2 500 жанкүйері болды. Олар қақпа артындағы мінберді толтырды.

Осыдан бірнеше жыл бұрын маңызды матчтардың бірінің алдында «Вираж» жігіттерінің базамызға келгені есімде. Олар бізді қолдап, ойынға міндетті түрде келетіндерін айтты. Сәттілік тіледі, мұндай қолдаудан кейін бізде жеңілуге ешқандай құқық болмады. Ол кездесуде біз жеңіске жеттік», – деді Әліп.

Нұралы Әліп санкт-петерборлық «Зенит» сапында 2022 жылдың басынан бері өнер көрсетіп келеді. Ресейлік клуб сапында қазақстандық қорғаушы үш дүркін ел чемпионы, сондай-ақ Ресей Кубогының иегері және Суперкубогының үш дүркін жеңімпазы атанды.

Бұған дейін Әліп Ақтау қаласында тұрғанда спорттағы алғашқы қадамдарын еске алды.