Словакия құрамасының экс-ойыншысы Ұлттар лигасы туралы: біз – фаворитпіз, бірақ Қазақстан күшейді

Алматылық «Қайраттың» словакиялық экс-қорғаушысы Лукаш Тесак ASnews.kz сайтына берген сұхбатында Ұлттар лигасындағы өз құрамасы мен Қазақстанның алдағы кездесуіне қатысты пікірін білдірді.

«Әрине, Словакия – топтың фавориті. Біз әлі де әлем чемпионатына баруымыз мүмкін. Құраманың жолы болады және бәрі жақсы болады деп үміттенемін. Бірақ сіздердің командаларыңыздың айтарлықтай күшейіп, біртіндеп алға жылжып келе жатқанын айту керек. «Қайраттың» Чемпиондар лигасындағы өнері Қазақстан құрамасына да серпін беретінін атап өткен жөн. Бұл жарыста әлемдегі ең жоғары футбол деңгейі көрсетіледі, сондықтан «Қайрат» үлкен тәжірибе жинады, бұл клубқа, одан қалды ұлттық құрамаға көп көмегін тигізеді. Тек дұрыс шешімдер қабылдау керек, сонда бәрі жақсы болады», – деді Тесак.

Ақпан айында Брюссельде УЕФА Ұлттар лигасының жаңа маусымының жеребесі тартылды. С лигасында өнер көрсететін Қазақстан ұлттық құрамасы үшінші топқа түсті. Словакиядан бөлек, қазақстандықтардың қарсыластары арасында Фарер аралдары мен Молдова бар. Жарыстың топтық кезеңі 2026 жылдың қыркүйек айынан қараша айына дейін жалғасады.

Словакиялық қорғаушы «Қайрат» сапында 2016 жылы өнер көрсетті. «Сары-қаралар» жейдесінде ол 21 матч өткізіп, бір гол соғып, үш нәтижелі пас берді. Халықаралық деңгейде Тесак Словакия ұлттық құрамасының намысын қорғап, төрт ойынға қатысқан.

Бұған дейін «Ақтөбеде» ойнаған молдовалық футболшы Словакия құрамасының бапкері Марек Гамшиктің сөзіне пікір білдірді.