Молдова құрамасының экс-футболшысы: қазақстандық шабуылшылардың ойынын тамсана қараймыз

«Мактаарал» клубы мен Молдова құрамасының бұрынғы қорғаушысы Артем Розгонюк ASnews.kz сайтына берген сұхбатында Қазақстанның Ұлттар лигасындағы матчтарына қатысты пікірімен бөлісті.

«Соңғы әлем чемпионатының іріктеу кезеңі мен статистикаға сүйенсек, болжам мынадай: Словакия, Фарер аралдары, Қазақстан және Молдова. Бірақ бұл – тек математика. Ал шынайы футбол мүлдем басқа.

Мен ұлттық құрамамыздың жаңа бапкерімен ұзақ уақыт бірге жұмыс істедім және оның дағдарыс кезеңдерінде де нәтиже көрсете алатынын білемін. Молдоваға қатысты да солай болады деп ойлаймын. Қазір бізде буын алмасу процесі жүріп жатыр, сондықтан жас ойыншыларға бейімделу үшін уақыт керек», – деді Розгонюк.

30 жастағы молдован футболшысының айтуынша, C3 тобында айқын фаворит те, аутсайдер де жоқ:

«Қазақстан құрамасы да буын алмасу кезеңінен өтіп жатыр, бірақ бұл командада өте дарынды әрі мықты шабуылшылар бар – олардың ойынын тамсана қарайтын боламыз. Алайда бұл топта мен нақты фаворит көріп тұрған жоқпын. Ойындарға дейін әлі жарты жыл бар, қазір кім мықты екенін айту қиын.

Бұл төрттікте Словакия ғана сәл ерекшеленеді. Ал Молдова мен Фарер аралдары шамалас деңгейде, сондықтан бәрін ұсақ-түйек дүниелер шешуі мүмкін», – деп қосты ол.

Талғат Байсуфинов баптайтын Қазақстан құрамасы турнирдегі алғашқы ойынын 26 қыркүйекте Фарер аралдарына қарсы өткізеді. Молдоваға қарсы алғашқы матч 2 қазанда өз алаңымызда өтсе, қарымта кездесу 14 қарашада Кишиневте болады.

Розгонюк «Мақтаарал» сапында 2022–2023 жылдары өнер көрсетті. Қорғаушы арқасындағы жарақаттарына байланысты мансабын аяқтады.