BBC Scotland тілшісі – Чесноковтың дебюті жайлы: «Хартс» жанкүйерлері дән риза

Hearts Standard редакторы және BBC Scotland спикері Джоэл Скед ASnews.kz сайтына берген сұхбатында «Хартс» вингері Ислам Чесноковтың «Хибернианға» қарсы матчындағы (1:0) ойынын бағалады.

«Чесноков эдинбургтік дербиде бұрыннан ойнап жүргендей әсер қалдырды. Негізгі құрамдағы алғашқы ойынына қарамастан, ол өте сауатты әрі сенімді қимылдады. Ислам алғашқы әрекеттерінде екінші қабаттағы күресте жеңіске жетіп, кейін тайсалмай допқа таласты. Бұл «Хартс» жанкүйерлеріне қатты ұнады.

«Хибернианға» қарсы маңызды матчтар әдетте аса көрнекті бола бермейді: мұнда тек күрес пен қақтығыс басым. Ал команданың жаңа ойыншысы одан қаймыққан жоқ. Кейін Макиннес («Хартстың» бас бапкері – ескерт.) оның қорғаныстағы жұмысын жоғары бағалады», – деді Скед.

Еске салайық, 26 жастағы Қазақстан ұлттық құрамасының ойыншысы қатарынан үш турды жіберіп алғаннан кейін «Хартстың» негізгі құрамында алаңға шығып, Шотландия чемпионатында дебют жасады. «Хибернианға» қарсы дербиде ол 76 минут ойнады.

Дерек Макиннестің командасы 57 ұпаймен турнир кестесінде көш бастап тұр, олар «Рейнджерс» пен «Селтикті» артта қалдырды.