«Зенит» бапкері – Әліптің Еуропаға ауысуы жайлы: басқа клуб іздеудің қажеті жоқ

«Зенит» бас бапкерінің көмекшісі және «Қайраттың» экс-ойыншысы Анатолий Тимощук ASnews.kz сайтына берген сұхбатында Нұралы Әліптің Еуропа чемпионатында өнер көрсету мүмкіндігін бағалады.

«Барлығы оның өзін ұлттық құрамада қалай көрсететініне байланысты деп ойлаймын. Өйткені скауттар халықаралық матчтарды, Чемпиондар лигасы мен Еуропа лигасын бақылайды. Ресей чемпионатын да қарайтыны сөзсіз. Өзін дәлелдеуге алғышарттар бар.

Бірақ ол мұнда бақытты деп ойлаймын. Ол – Ресей чемпионы, алаңға жиі шығады және ұлттық құрамаға шақырту алып жүр. Менің ойымша: егер бір жерде жағдайың жақсы болса, басқа жақтан бақыт іздеудің қажеті жоқ. Қай жерде жайлы, сол жерде болу керек. Қазіргі уақытта ол нақты өзіне керекті жерде жүр», – деді Тимощук.

Нұралы Әліп «Зенитке» 2022 жылдың басында қосылды. Осы уақыт ішінде 24 жастағы қорғаушы үш дүркін Ресей чемпионы атанды, сондай-ақ ел Кубогы мен Суперкубогын жеңіп алды.

Алматылық «Қайрат» сапындағы ойындарымен қазақстандық жанкүйерлерге жақсы таныс Анатолий Тимощук 2017 жылдан бері петерборлық клубтың бапкерлер штабында жұмыс істейді.

Бұған дейін Тимощук Әліп ресейлік клубтың назарына қалай ілінгенін айтып берген болатын.