Әліп – «Зениттегі» алғашқы кезеңі жайлы: жалға алу мерзімі біткен соң қайтамын деп ойладым

Қазақстан құрамасының капитаны, санкт-петербургтік «Зенит» клубының қорғаушысы Нұралы Әліп ASnews.kz сайтына берген сұхбатында Ресейдегі алғашқы жылын еске алды.

«Бейімделу қиын болды ма? Иә, себебі мені бастапқыда жалға алған еді. Сол жылдың қыркүйек айында жалға алу мерзімі аяқталған соң қайтадан «Қайратқа» ораламын деп ойладым.

Қараша айында соңғы ойындар өтті, желтоқсанда командадан кетемін деп ойладым. Бірақ келісімшартты соңына дейін адал атқарғым келді, сондықтан жаттығуларда барымды салдым», – деді Нұралы.

Қорғаушының айтуынша, бұл кезеңде агентімен болған әңгіме шешуші рөл атқарған.

«Агентім: «Нурик, әлі ештеңе шешілген жоқ, жұмысты жалғастыру керек», – деді. 2022 жылы Қайрат Советаевич (Боранбаев – ред.) қиындықтарға тап болды, сондықтан ол жанымда бола алмады, байланыста да көп болған жоқпыз.

Агент жыл соңына дейін сабыр сақтап, жұмыс істеу керектігін айтты. Кейіннен «Зенит» екі жылдық келісімшарт ұсынды. Сол сәттен бастап ойым өзгерді, алаңда өзімді дәлелдеуге толық дайын болдым», – деді Әліп.

Нәтижесінде қорғаушы тек Санкт-Петербургте қалып қана қоймай, команданың маңызды ойыншыларының біріне айналды.

«Араға бір жыл салып, Ресей Кубогының финалында жеңіс голын соғу бақыты бұйырды. Осыдан кейін клуб маған үш жылдық, жақсартылған жаңа келісімшарт ұсынды», – деп түйіндеді футболшы.

Нұралы Әліп 2022 жылдың басында «Қайраттан» «Зенитке» ауысты. Осы уақыт ішінде 26 жастағы қорғаушы Ресейдің үш дүркін чемпионы атанды, бір рет Кубок және үш рет Суперкубокты жеңіп алды.

Бұған дейін «Зенит» бас бапкерінің ассистенті Анатолий Тимощук Әліп ресейлік клубтың назарына қалай ілінгенін айтып берген болатын.