ҚПЛ тарихындағы алғашқы поляк футболшысы – Пробеж туралы: ол мінезді бапкер

«Астана-1964» командасының бұрынғы жартылай қорғаушысы әрі футбол агенті Павел Хайдучек ASnews.kz тілшісіне берген сұхбатында жақын арада Қазақстан құрамасының бас бапкері болуға кандидат ретінде қарастырылып жатқан Михал Пробеж туралы пікір білдірді.

«Маған Пробеждің барлығына бірдей қарайтыны ұнайды. Ол ешқашан Федерация президентімен жақсы араласып, еден жуушы мен ойыншыға дөрекі болған емес. Бұл өте құнды қасиет», – деп атап өтті Хайдучек.

Маман сонымен қатар Пробеждің польшалық «Термалика» клубында небәрі екі күн жұмыс істеп, кетіп қалғаны туралы өз ойын айтты:

«Мен нақты айта алмаймын, өйткені жағдайды толық білмеймін. Бірақ менің білуімше, клуб Михалдың кейбір талаптарын орындай алмады. «Краковиядан» кейін оның үлкен амбициялары болды. Ақырында тараптар қол алысып, екі жаққа кетті. Бұл Пробеждің мінезі бар екенін растайды: келісімшарт болғанымен, клуб оның айтқанын тыңдамаса, өз жолымен кетіп қалады», - деп қосты Хайдучек.

Хайдучек 2012 жылы «Астана» сапында ойнап, ҚПЛ тарихындағы алғашқы поляк футболшысы атанды. Қазіргі уақытта ол футбол агенті болып жұмыс істейді.

Бұған дейін ол Михал Пробеждің Қазақстан құрамасының бас бапкері қызметіне лайықты екенін айтқан болатын.