ҚПЛ-да ойнаған польшалық футболшы: Пробеж – Қазақстан құрамасы үшін жақсы нұсқа

«Астана-1964» клубының бұрынғы жартылай қорғаушысы әрі агент Павел Хайдучек ASnews.kz тілшісіне Михал Пробеждің Қазақстан құрамасына лайықты бапкер екенін айтты.

«Мен Пробежді жерлесім болғандықтан мақтай бермеймін, бірақ ол шын мәнінде жақсы бапкер. Ол тез арада Польшаның жоғарғы лигасына көтеріліп, «Ягеллониямен» бірге екі кубок жеңіп алды, «Краковияны» ретке келтіріп, ұлттық құраманы қолға алды. Біліктілігі жоқ бапкер болса, бұған жете алмас еді.

Михалдың өзі футболшы болғандықтан, өз ойыншыларына талап қоя біледі – бұл үлкен артықшылық. Пробеж тәжірибелі ойыншылармен жұмыс жасай алады және жас ойыншыларға мүмкіндік береді. Сондай-ақ ол әрқашан өз командасынан күшті мінезді және алаңның әр сантиметрі үшін күресуді талап етеді. Ол Қазақстан құрамасы үшін жақсы нұсқа», – деді Хайдучек.

БАҚ-тың хабарлауынша, ҚФФ 53 жастағы полякты бас бапкер қызметіне үміткер ретінде қарастырып жатыр. 2023 жылдың қыркүйегінен 2025 жылдың маусымына дейін Пробеж Польша құрамасын жаттықтырды.

Пробеждің тұсында атақты шабуылшы Кшиштоф Питек «Краковиядан» «Дженоаға», ал қақпашы Бартломей Дронговский «Ягеллониядан» «Фиорентинаға» ауысты. Бапкер ретінде 570 матч өткізіп, 230-да жеңіске жетті.

Бұған дейін Ресей құрамасының қорғаушысы Мингиян Бевеев азаматтығын ауыстырып, Қазақстан құрамасында ойнауды мүлдем жоспарламағанын айтқан еді.