«Қызылжардың» экс-қорғаушысы – Тапалов туралы: прогресс жасап жүрген еңбекқор жігіт

«Қызылжардың» бұрынғы қорғаушысы Брайан Ван Ден Богарт BorodAbata.kz (AS News) сайтына берген сұхбатында Еркін Тапаловтың жетістіктерін атап өтті. Олар кезінде Әли Әлиевтің жетекшілігімен петропавлдық клуб сапында бірге ойнаған болатын.

«Мен Тапаловты жақсы білемін, біз бірге отыз матч өткізген шығармыз. Онымен әлі де байланыстамын, жақын арада оны, бапкерді және қазақстандық басқа да көптеген достарымлы Бельгияға келген кезде көретін боламын. Еркін – керемет жігіт және ақыл-ойы мықты еңбекқор футболшы.

Тапаловты алдап өту үшін алдымен оны бес рет айналдыру керек. Мен оның бабына келіп, Премьер-лигада да, Чемпиондар лигасында да жақсы өнер көрсетіп жатқанына өте қуаныштымын. Оның прогрессін көру керемет екен», – деді бельгиялық футболшы.

Биылғы маусымда Тапалов барлық турнирлерде 23 матч өткізіп, екі гол соқты. 31 жастағы қорғаушы алматылық команданың Чемпиондар лигасындағы жетістігіне үлкен үлес қосты.

Ван Ден Богарт 2023 жылдың басында «Қызылжар» сапына қосылды. Чемпионатта 19 матч өткізгеннен кейін отбасылық жағдайға байланысты клубтан кетті.