Ғалымжан Кенжебек: Екі жыл бұрын футболдан кетуді ойладым

Қазір Словакияның «Кошице» клубында доп теуіп жүрген Қазақстан құрамасының шабуылшысы Ғалымжан Кенжебек YouTube-тағы BorodAbata арнасына берген сұхбатында өміріндегі қиын кезең туралы айтып берді.

«Футболда жолым болмай жүрді. «СКА-Хабаровск» клубында қаралымнан өттім. Бірақ неге екенін білмеймін, мені керек етпеді. Сондықтан Таразға қайтып кеттім. Бір айдай үйде жатып, футболдан кетуді де ойладым.

Не өзгергенін білмеймін, жарты жылдан кейін «Жеңіспен» келісімшартқа отырып, жолым ашылғандай болды.

Қиын сәтте анаммен де, бауырларыммен де сөйлестім. Бірақ футболға оралу туралы әңгіме болмаса да, олардың қолдауын сездім. Дәл сол сәтте басымда көп мәселелер болды. Ешқандай клуб керек етпегендіктен, футболдан біржолата кетіп, басқа жұмыс істеуді ойладым. Достарым «сен сияқты ойыншылар аз, еңсеңді түсірме, берілме» деп қолдау көрсеткен соң, өз-өзіме келіп, жарты жылдық үзілістен кейін «Жеңіспен» келісімшарт түздім. Әрі қарай жолым болып кетті», – деді 22 жастағы футболшы.

Ғалымжан 2024 жылдың басында «Жеңіске» ауысып, тамыз айында Кипрдің «Акритас Хлоракас» клубына кетеді. Ал осы жылдың басынан бері Словакияның «Кошице» командасында өнер көрсетуде.