«Ақтөбе – мен үшін бөтен қала емес»: «Ұлытау» форварды голды тойлауын түсіндірді

Жезқазғандық «Ұлытаудың» шабуылшысы Бақдәулет Зульфикаров ASnews.kz сайтына берген сұхбатында ҚПЛ-дың 27-туры аясындағы «Ақтөбеге» қарсы матчта (2:2) орын алған оқиғаға қатысты пікір білдірді.

«Ақтөбе» қақпасына бірінші голды соққаннан кейін, форвард оны өзіне тән мәнерде атап өтті. Бұл ақтөбелік жанкүйерлер тарапынан үлкен наразылық толқынын тудырды:

«Бірінші гол соққан кезде оны өз мәнерімде тойладым. Сол ойын кезінде және ойыннан кейін дәл сол тойлағаным үшін жаман пікірлер жазылды. Бұл – провокация емес. «Ақтөбе» жанкүйерлеріне немесе командаға бағытталған жест болмады», – деп түсіндірді Зульфикаров.

Трибунаның реакциясын түсінген шабуылшы кездесу барысында жағдайды реттеп, ушықтырмауды жөн көріпті.

«Соны түсініп, екінші гол соққанда жанкүйерлерге құрмет ретінде оны тойламадым, бұл менің құрмет көрсеткенім. Ойыннан кейін 13-секторға қарай жақындап, басымды иіп кеттім. Ешқандай да провокация жасағым келген жоқ. Ақтөбе – мен үшін бөтен қала емес. Анам – Ақтөбенің тумасы және де барлық нағашыларым да Ақтөбеден. Сондықтан, есесіне қарсыласқа гол соққан кезде провокация жасаймын деген ой мүлдем болмады», – деп түйіндеді футболшы.

Еске сала кетейік, 25 жастағы Бақдәулет Зульфикаров «Ұлытау» сапына биылғы маусымның ортасында қосылды. Жезқазғандық клуб үшін өткізген 12 матчта шабуылшы бес гол соғып, бір нәтижелі пас беріп үлгерді. Өткен турдағы «Ақтөбеге» қарсы матч 2:2 есебімен – тең нәтижемен аяқталды.

«Ақтөбеге» провокация істегім келмеді»: «Ұлытау» сұрмергені – Хусанов пен ұлттық құрама жайлы