«Қазақстан футболына абырой керек»: Ақпаев ҚФФ-ға үндеу жасады

Қазақстан футбол одағының (ҚФО) бұрынғы бірінші вице-президенті Тілекбек Ақпаев алдағы ҚФФ ХХХІ сайлау конференциясының делегаттарына арнайы мәлімдеме жасады.

ASnews.kz редакциясына ұсынылған үндеуінде белгілі функционер шетелдік мамандарды тағайындау мәселелерін көтеріп, отандық футболды дамытудың негізгі қадамдарын ұсынды.

Шетелдіктер мен басқару туралы

«Құрметті конференция делегаттары, атақарушы комитет мүшелері, федерация басшылығы және қазақстандық футболдың тағдырына бейжай қарамайтын барша қауым! Конференция қарсаңында мен сіздерге үлкен шешімдердің құнын білетін адам ретінде алаңдаушылықпен үндеу жасағым келеді. Қазақстан футболы конференциясының тарихи ауқымдағы шешімдер қабылдау тәжірибесі бар.

Федерациядағы негізгі лауазымдарға шетелдік мамандар шақырылды. Бұл шешім белгілі бір күмәндер туғызады, өйткені басқа елдердің тәжірибесін зерттеу бір бөлек, ал қазақстандық футболды басқарудың негізгі тетіктерін шақырылған мамандардың қолына табыстау мүлде басқа дүние. Бірақ шетелдік тәжірибе дамудың нақты тұжырымдалған мақсатына қызмет еткенде ғана пайдалы. Ол қандай мақсат? Жетістіктерді (KPI) кім және қандай критерийлер бойынша бағалайды? Егер күтілген өзгерістер болмаса, жауапкершілікті кім өз мойнына алады?»

Басты пікірталас не туралы болуы керек?

«Бүгінде қазақстандық футболды бизнес ретінде құрудың негізі ретінде берік құқықтық іргетас қалау өте маңызды. Басты пікірталас не туралы болуы керек?

Арнайы футбол туралы заң. Федерацияның, мемлекеттің және өңірлік қауымдастықтардың өкілеттіктері мен жауапкершілігі; лигалар мен клубтардың регламенттері; қаржыландыру (коммерцияландыру), инфрақұрылымды дамыту, резерв дайындау, телевизиялық және коммерциялық құқықтарды пайдалану ережелері бекітілген бірыңғай шоғырландырылған құқықтық іргетас – Қазақстан Республикасындағы футбол туралы заң қажет. Ойын ережелері тек алаңда ғана емес, барлық жерде түсінікті болуы тиіс.

Бесжылдық даму бағдарламасы туралы. Әрбір өңір үшін нақты стратегиялық міндеттері, мерзімдері, жауапты тұлғалары, бюджеті және өлшенетін нәтижелері бар нақты әрі түсінікті бағдарлама керек.

Сайлаудың ашықтығы мен жеке жауапкершілік туралы. Футбол қауымдастығы қандай да бір мүшенің/маманның не үшін сайланғанын немесе шақырылғанын, одан қандай нәтиже күтілетінін, оның жұмысы қандай мерзімде және қандай критерийлер бойынша бағаланатынын білуге құқылы.

Қоғам үшін нақты және айқын өзгерістер маңызды. Футбол, Йохан Кройф айтқандай, қарапайым ойын, бірақ қарапайым футбол ойнау өте қиын. Басқару ісінде де дәл осылай шығар, өйткені басты қағидалар түсінікті, бірақ оларды күн сайын сақтау өте қиын. Қазақстан футболына айқын жол, өз заңы, кәсіби мамандар және өз үйінің қожайыны деген абырой керек».

Тілекбек Ақпаев, ҚФО бірінші вице-президенті (2000–2005 жж.), педагогика ғылымдарының докторы.

Еске сала кетейік, соңғы кездері қазақстандық футболдағы негізгі қызметтерге шетелдік мамандар тағайындалды. ҚФФ бас хатшысы болып аустралиялық Скотт Манн, ұлттық құраманың бас бапкері қызметіне нидерландтық Джон ван ’т Схип, ал федерацияның техникалық директоры лауазымына молдовалық маман Геннадий Скуртул келді. ҚФФ-ның қазіргі президенті – Марат Омаров.

Арман орындалды: Қазақстанның Еуропаға өтуіне себепші болған тұлға УЕФА Суперкубогының Астанада өтуі жайлы