Арман орындалды: Қазақстанның Еуропаға өтуіне себепші болған тұлға УЕФА Суперкубогының Астанада өтуі жайлы

Қазақстан футбол одағының (ҚФО) 2000–2005 жылдардағы бұрынғы бірінші вице-президенті және еліміздің УЕФА-ға өтуіне басты себепкер болғандардың бірі Тілекбек Ақпаев ASnews.kz тілшісіне берген сұхбатында 2028 жылғы УЕФА Суперкубогының финалын Астанада өткізу туралы шешімге қатысты пікір білдірді.

Глазгода басталған арман

Функционердің айтуынша, еуропалық футболдың ауқымын сезінуі 2002 жылдың мамырында, Қазақстан УЕФА-ға мүшелікке қабылданғаннан кейін бірден келген.

«2002 жылдың мамырында мені Леннарт Юханссон Глазгодағы «Реал» мен «Байер» арасындағы Чемпионгар лигасының финалына жеке шақырды. Сол кезде мен мұндай шаралардың қалай ұйымдастырылатынын және финалға қандай ауқымды тұлғалар қатысатынын өз көзімен көрдім. Испания королі Хуан Карлос I-мен, әлемдік деңгейдегі бапкерлер Арсен Венгер, Алекс Фергюсонмен және басқа да қонақтармен жеке танысып, сөйлесуге мүмкіндігім болды. Алекс Фергюсонмен аз-кем тілдесіп, оны Қазақстанға қонаққа шақырдым. Ол шақыруым үшін алғыс айтып, бір күні шынымен де келуі мүмкін екенін айтты. 2019 жылдың қарашасында «Манчестер Юнайтед» Астанаға келді. Қазақстан футболының УЕФА-ға қабылдануынан туған эйфорияға бөленіп, бір күні еурокубок финалының Қазақстанда да өтетіні туралы сол кезде мүмкін емес болып көрінген арман пайда болды. Ал бүгінде 2028 жылғы УЕФА Суперкубогының финалы Астанада өтетініне өте қуаныштымын», – деп еске алды Ақпаев.

Жай ғана сырттай бақылаушылар емес

Тілекбек Ақпаев УЕФА тарапынан біздің елімізге көрсетілген сенім 24 жыл бұрын жасалған тарихи таңдаудың дұрыстығын дәлелдейтініне баса назар аударды.

«Суперкубок финалының Қазақстанда өтетіні маған ерекше қуаныш сыйлайды. Қазақстандық жанкүйерлер бұл ұмытылмас ойынды өз көздерімен көре алады. Біздің жанкүйерлерге көп билет тимей қалуы мүмкін екенін түсінемін, өйткені оларды алдымен УЕФА таратады. Сонымен қатар, Қазақстан финал өткізудің мол тәжірибесін жинақтайды. Келесі жылы Астанада УЕФА Конгресі екінші мәрте өтеді. Мұның бәрі елімізде футболды насихаттау үшін аса маңызды», – деп атап өтті ҚФО бұрынғы вице-президенті.

Steppe Football Style философиясы

Бұрынғы функционер ұлттық футбол бірегейлігіне ерекше назар аударып, Steppe Football Style (Дала Футбол Стилі) тұжырымдамасын таныстырды. Оның пікірінше, федерацияның қазіргі идеологиясы («Батыр Жолы») халықаралық жоғары амбицияларға толық сай келмейді.

«2001 жылдың желтоқсанында УЕФА Атқару комитетінің Қазақстанды еуропалық футбол отбасына қабылдауды ұсыну туралы шешім қабылданған отырысынан кейін, үйге қайтар жолда Франкфурт әуежайынан итальяндық «La Gazzetta dello Sport» газетін сатып алдым. Газет Қазақстанның еуропалық футболға ұмтылып келе жатқанын айта келіп, «Қазақ баласы футбол добымен далада билеп жүр» деген есте қаларлық бейнені қолданған еді».

Ақпаевтың пікірінше, Steppe Football Style – бұл Еуразияның ұлан-ғайыр даласында пайда болған ұлттық футбол философиясы және кәсіби футболды дамыту моделі. Италиялық көзқарас үш ұғымды өзара ұштастырды: Қазақстан, степь (дала) және футбол. Steppe Football Style – әлемдік футбол қоғамдастығында қазақстандық футболдың танымал бейнесіне айнала алады.

Еске сала кетейік, УЕФА Атқару комитеті Салоникиде өткен отырыста 2028 жылғы Суперкубок матчы өтетін орынды ресми түрде бекітті. Ауқымды футбол оқиғасын өткізу Қазақстан астанасына сеніп тапсырылды. Матч «Астана Арена» стадионында өтеді. Еуропаның беделді жүлдесі сарапқа салынатын бәсекеде дәстүрлі түрде Чемпиондар лигасы мен Еуропа лигасының жеңімпаздары өзара мықтыны анықтайды. Матчтың нақты күні кейінірек жарияланады.