«Астана» қорғаушысы клубтың қарыздары мен «Ордабасыға» ұтылуы туралы айтты

Елордалық «Астананың» литвалық қорғаушысы Кипрас Кажуколовас ASnews.kz сайтына берген сұхбатында шымкенттік «Ордабасыға» қарсы сырт алаңдағы матчтың (0:1) қорытындысын бағалап, клубтың соңғы кездегі қаржылық қиындықтары туралы сұрақтарға жауап берді.

– Кипрас, жақсы ойын өрнегін көрсеткеніне қарамастан, команда соңғы минуттарда гол жіберіп алды. Мұның басты себебі неде? Концентрацияны жоғалту ма?

– Мұны концентрацияны жоғалту деп атауға бола ма, білмеймін. Бұл – футбол, мұндай жағдайлар болып тұрады. Бәрі өте тез болды. Ойынды талдап, нақты қай жерде қателік жібергенімізді түсінгеннен кейін көреміз.

– Келесі матч – «Қайратқа» қарсы аса маңызды текетірес. Команда бұл ойынға психологиялық тұрғыда қалай дайындалып жатыр?

– Әрине, біз әр ойында күресуге дайынбыз. «Қайратқа» қарсы матчтың қаншалықты маңызды екенін түсінеміз. Біз үшін бұл әрқашан үлкен ойын. Кез келген басқа матч сияқты дайындаламыз. Жігіттердің барлығының мотивациясы зор. Әрине, біз тек жеңіс үшін ойнауға шығамыз.

– Маусымның басында арқаңыздан ауыр жарақат алдыңыз. Қазір өзіңізді қалай сезінесіз және ұзақ үзілістен кейін физикалық бабыңызға келу қиын болды ма?

– Ұзақ үзілістен кейін алаңға оралғаныма өте қуаныштымын. Мен дайынмын және маусымның қалған бөлігін асыға күтемін. Бабыма келу шынымен де өте қиын болды. Алғашқы бес айда іс жүзінде ештеңе істей алмайсың, ең аз жаттығуларды ғана орындайсың. Жүз пайыздық қалпыма келу үшін уақыт қажет. Бірақ жанымда маған көмектескен жақсы адамдардың болғанына қуаныштымын. Бұл қиын кезең болды, бірақ қазір бәрі жақсы.

– Жуықта клубтың барлық қарыздарын өтегені туралы ақпарат шықты. Бұл қаржылық қиындықтар командаға қаншалықты қатты әсер етті?

– Интернеттен бәрі бәрін біліп отыр. Бірақ, меніңше, команданың көңіл-күйі әрқашан жақсы. Біз үнемі ойнауға дайынбыз. Қандай қиындықтар болмасын, олар ұжымның ішінде қалады. Жаттығуды немесе ойынды бастаған сәтте біз айналада болып жатқан немесе болмай жатқан жағдайлардың бәрін ұмытамыз. Біз тек футболға назар аударамыз және ең бастысы осы.

– «Астана» сияқты үлкен клубтың мұндай қаржылық мәселелерге тап болуы аздап мұңайтады дегенге келісесіз бе?

– Біздің бәріміз кәсіпқоймыз, сондықтан мұңаймаймыз да, ашуланбаймыз да. Біз әрқашан жаттығуға, ойнауға және команда мен өзіміз үшін 100% барымызды салуға дайынбыз. Жағдай қандай болса да, біз өз жұмысымызды істеуіміз керек. Менің ойымша, осы айлар ішінде біз жоғары кәсібилік таныта білдік. Біз күресіп, өте жақсы футбол ойнап жүрміз. Сондықтан біз бұған тек қуаныштымыз және ойынға көңіл бөлеміз. Бізді басқа ешқандай мәселелер алаңдатпайды.

Еске сала кетейік, Шымкенттегі Орталық стадионда өткен 26-тур матчы «Ордабасының» «Астананы» 1:0 есебімен жеңуімен аяқталды. Кездесу тағдырын 78-минутта Жасұлан Әмірдің дәл соққысы шешті.

Бұл жеңіс шымкенттік клубқа 58 ұпай жинап, Қазақстан премьер-лигасының турнирлік кестесінде бірінші орынға шығуға мүмкіндік берді. «Астана» тур қорытындысы бойынша үшінші сатыда қалды.

«Қайраттың» қателескенін күтеміз»: «Ордабасы» қорғаушысы «Астананы» жеңгені туралы