Қазақстан құрамасына үміткер Нұртас Адамбаймен туыстығы туралы айтты

Семейлік «Елімайдың» жартылай қорғаушысы әрі Қазақстан құрамасына үміткер Әди Адамбаев белгілі отандық актер әрі режиссер Нұртас Адамбаймен туыстық байланысы туралы айтып берді, деп хабарлайды ASnews.kz.

Футболшының айтуынша, кино қайраткері оның ағасы болып келеді. Ойыншы туысына қатысты айтылған сынға да пікір білдірді.

«Атамның ағасы бар, бұл кісі – соның ұлы. Ол маған туыс боп келеді. Әрине, мен ол туралы жаңалықтарды оқимын. Бірақ, көріп тұрғандарыңыздай, оны ешкім жеке танымайды, тіпті мен де жақсы біле бермеймін. Қалай өмір сүреді, қалай араласады, не істейді, не ойлайды... біз жиі кездесе бермейміз. Оны соңғы рет қашан көргенім есімде жоқ. Бәлкім, 2-3 жыл бұрын белгілі бір жиында шығар. Хейтке қатысты айтарым: кез келген адам хейт айта алады, бірақ кез келген адам адамды түсіне алмайды. Жақында Меккеге ұштым, біраз нәрседен хабары бар екенін біліп, Нұртас ағама қоңырау шалдым. Қайда бару керек, не істеу керек, түрлі лайфхактар туралы сұрап білдім. Ол маған бәрін сабырмен түсіндіріп берді. Ол әрқашан байланыста», – деп бөлісті Адамбаев.

Биылғы маусымда Әди Адамбаев «Елімай» сапында барлық жарыста 11 матч өткізді. Бұған дейін жартылай қорғаушы Қазақстан ұлттық құрамасының оқу-жаттығу жиындарына шақырылған болатын.

Еске сала кетейік, жақында Нұртас Адамбай футбол туралы бұрынғы даулы мәлімдемелерінің қате болғанын көпшілік алдында мойындаған еді. Ол діни көзқарасқа байланысты бұл спорт түрінен бас тартуға шақырған өз сөздерін «нағыз ақымақтық» деп атап, егер оның қатаң пікірі біреуді діннен алыстатқан болса, қатты өкінетінін жеткізді.

«Бұл ақымақтық болды»: Нұртас Адамбай футбол туралы айтқан сөздерінен қателескенін мойындады