«Солд-аут күтеміз»: «Ордабасы» қақпашысы жанкүйерлерді чемпиондық үшін күресте трибунаны толтыруға шақырды

Шымкенттік «Ордабасының» қақпашысы Бекхан Шайзада ASnews.kz басылымына берген сұхбатында премьер-лиганың 24-турында «Қызылжарды» жеңгеніне (3:0) қатысты пікір білдіріп, маусымның шешуші кезеңі алдында жанкүйерлерге үндеу тастады.

«Бұл ойынға біз өте жақсы дайындалдық. Өткен турдың кейінге шегерілуіне байланысты бізде үлкен үзіліс болды. Сол үзіліске қарамай, өзіміздің ойынымызды ойнап, алға қойған мақсатымызға жеттік деп ойлаймын. Барша шымкенттік жанкүйерлерді жеңіспен құттықтаймын. Бізбен бірге болыңыздар, өз алаңымызда екі-ақ ойын қалды. Соларға келіп, бізді қолдаңыздар. Солд-аут жасайық!

Келесі ойынды «Оқжетпеске» қарсы өткіземіз. Бірінші орында келе жатырмыз және осы орынды сақтап қалу үшін бізге әр ойын маңызды, өйткені әр бәсеке өз қиындығымен келеді. Өз ойынымызды көрсетіп, үш ұпайды алуға тырысамыз», – деді Шайзада.

«Қызылжарды» жеңу арқылы шымкенттік клуб 23 матчтан кейін 55 ұпай жинап, ҚПЛ турнирлік кестесіндегі орнын нығайта түсті.

Қазақстан чемпионатының 25-туры аясындағы «Оқжетпес» пен «Ордабасы» арасындағы кездесу 5 қыркүйекте Көкшетауда өтеді.

«Ордабасы» жартылай қорғаушысы Капацина чемпиондық бәсеке туралы пікір білдірді

«Балалық қателіктер жібердік»: Нойок «Қызылжардың» «Ордабасыдан» ұтылуын бағалады