«Ордабасы» жартылай қорғаушысы Капацина чемпиондық бәсеке туралы пікір білдірді

Шымкенттік «Ордабасының» жартылай қорғаушысы Михай Капацина ASnews.kz басылымына берген сұхбатында ҚПЛ-ның 24-турында «Қызылжарды» өз алаңында жеңгеніне (3:0) қатысты пікір білдірді.

«Ойын ауыр болды. 3:0 есебіне қарамастан, жеңіс оңайлықпен келген жоқ, өйткені «Қызылжар» – жақсы команда, құрамында мықты футболшылар бар. Бірақ біз үш ұпай алғанымызға өте қуаныштымыз – бұл біз үшін ең бастысы, себебі чемпиондық титул үшін күресіп жатырмыз.

Келесі ойынды сырт алаңда «Оқжетпеске» қарсы өткіземіз. Әрине, матчты кеше ғана аяқтадық, қуанып, сәттен сәл де болса ләззат алдық, бірақ бүгіннен бастап барлық ойымыз – «Оқжетпесте». Бізді күрделі жасанды төсеніште өтетін қиын бәсеке күтіп тұрғанын білеміз, бұл қарсыласқа сәл де болса артықшылық беруі мүмкін. Бірақ біз ол жаққа жеңіс үшін барамыз, өйткені алтын үшін күресті жалғастырғымыз келеді», – деді румыниялық футболшы.

24-турдың алғашқы ойын күнінен кейін «Ордабасы» 23 матчта 55 ұпай жинап, Қазақстан чемпионатында сенімді түрде көш бастап тұр. Көкшетаулық «Оқжетпес» те дәл сондай матч санын (23) өткізіп, 39 ұпаймен кестенің төртінші орнына жайғасқан.

ҚПЛ-дың 25-туры аясындағы «Оқжетпес» пен «Ордабасы» арасындағы кездесу 5 қыркүйекте Көкшетауда өтеді.

«Балалық қателіктер жібердік»: Нойок «Қызылжардың» «Ордабасыдан» ұтылуын бағалады