Дизайнер «Ордабасының» жаңа логотипі туралы: керемет дүние жасағысы келді, бірақ нәтижесі…

Дизайнер әрі Қазақстан ұлттық құрамасы формасының бұрынғы әзірлеушісі Нұрлыбек Бухпин ASnews.kz сайтына берген сұхбатында «Ордабасы» клубының ребрендингіне қатысты өз пікірін білдірді.

«Бұл логотиптің де өмір сүруге құқығы бар, уақыт өте келе өз аудиториясы мен жанкүйерлерін табады. Бірақ кәсіби тұрғыдан қарасақ, сыртқы келбетін мұншалықты түбегейлі өзгертпеу керек еді. Немесе бұған дейін жарияланған салт атты нұсқасын соңына дейін жеткізген дұрыс болар еді. Салт атты мен «ORDA» атауының арасында тығыз байланыс бар. Эмблема пішінінің қызғалдаққа ұқсауына ешқандай кінә арта алмаймын, бірақ монограмманың жасалуы сұрақтар туғызады.

Ол кішігірім форматта, мысалы, киімдегі тігісте қалай көрінеді? Өлшемі кішірейген сайын әріптер бірігіп, оқылуы қиындай түседі. Жалпы, «Ордабасының» болашақтағы стилін бақылау қызық, өйткені ребрендинг – бұл тек логотип емес, ол стратегияның, құндылықтар мен визуалды коммуникацияның өзгеруі. Заманауи әрі керемет дүние жасағысы келген сияқты, бірақ қолдан келгені осы болды», – деді сарапшы.

«Ордабасы» ресми түрде ребрендинг жариялады. Шымкенттік клуб 2027 жылдан бастап қолданатын жаңа эмблема қаланың ресми символы әрі туристік логотипі – қызғалдаққа сілтеме жасайды, сондай-ақ жауынгер қалқаны ретінде оқылады.

Келесі маусымда «Ордабасының» өз алаңында киетін негізгі формасы көк-ақ түсте, ал сырт алаңдағы жиынтығы қара түсте орындалатыны белгілі болды.