Юрий Медведев: Вайсс мені «Қайратқа» шақырып, азаматтыққа қатысты нюанстарды түсіндірді

«Слован Братислава» клубының қорғаушысы әрі Ақтөбе облысының тумасы Юрий Медведев BorodAbata.kz сайтына берген сұхбатында Вайсстың оны «Қайратқа» қалай шақырғанын еске алып, Қазақстан құрамасында ойнамау себебін түсіндірді.

«Владимир Вайсс алматылық клубты жаттықтырған кезде мені «Қайратқа» шақырды – ол кезде бұл туралы білмедім. Кейін ол «Слованды» тізгіндеген кезде маған бәрін түсіндіріп берді. Біз Қазақстан құрамасында ойнау мүмкіндігін де талқыладық. Вайсс бірден қос азаматтық ала алмайтынымды айтты. Бұл менің таңдауым, бірақ ол маған бірден ескертті: егер Қазақстан азаматтығын қабылдасам, Чехия азаматтығынан автоматты түрде айырыламын. Ол кезде Еуропада мені легионер ретінде санайтын болады», – деді Медведев.

Медведев Қазақстанда дүниеге келген, бірақ жастайынан Чехияда тұрып, сол жақта доп тепкен. Қазір ол Словакияның «Слован» командасында ойнап жүр және чехиялық төлқұжаты бар.