Сыйақылар, көлік және PlayStation: ҚПЛ бапкері Еуропада дауға қалды

«Жальгирис» басшылығы қазіргі «Атыраудың» бас бапкері Владимир Чебуриннің есімі аталатын аудит нәтижелерін жариялады, деп хабарлайды ASnews.kz Žmonės.lt басылымына сілтеме жасап.

Вильнюстік «Жальгиристің» жаңа басшылығы клубтың 2021–2025 жылдардағы – оны іс жүзінде көпжылдық директор Вильма Венсловайтене басқарған кезеңдегі қызметінің аудит нәтижелерін ұсынды.

«Аудит 2021–2025 жылдары бапкерге 0,5 млн еуроға жуық сыйақы төленгенін анықтады», – деді арнайы баспасөз мәслихатында клуб президенті Андрюс Тапинас.

Оның айтуынша, кейбір трансферлер үшін маманға келісімшарт сомасының 30%-ы да тиесілі болған – барлығы 84 мың еуро.

«Аудиторлардың пікірінше, бұл қаражаттың бір бөлігі құжаттармен расталмаған», – деп атап өтті Тапинас.

Бұдан бөлек, аудиторлардың мәліметінше, оларда 2025 жылы көлік сатып алуға берілген 61 000 еуро көлеміндегі аванс бойынша да сұрақтар бар.

Литвалық журналист: Чебурин мен «Жальгирис» басшысы жақсы қарым-қатынаста

Сарапшыларда клубтың басқа да шығыстары сұрақ туғызды: әрқайсысы 560 еуродан тұратын курткалар (паркалар), 909 еуролық ерлер әмияндары, GoPro-ға арналған қорғаныс кейстері, PlayStation аксессуарлары, бұта кескіш, бақша жиһазы, бастырма, құны 3623 еуро болатын жоғары қысымды жуғыш аппарат.

Аудиторлар 250 мың еуроға жуық өкілдік шығыстардың, сондай-ақ 20 мың еуродан астам әуе ұшуларының негізділігін де растай алмады – билеттердің бір бөлігі бойынша қажетті құжаттар болмаған. Түгендеу кезінде «Жальгиристің» балансында тұрған мүліктің де бір бөлігі табылмаған.

«Аудиторлардың мекеме мүлкі мен қаржысы тиімді басқарылды ма, басқару және әкімшілендіру процестері тиісті әрі нәтижелі болды ма деген сұраққа жауабы қысқа болды – жоқ», – деп атап өтті Тапинас.

Клубтың қазіргі басшылығы заңгерлермен кеңесіп жатыр.

«Қазіргі уақытта кеңесулер өтуде және біз қаражатты талан-таражға салу ықтималдығына байланысты заңды қадамдар жасауды жоспарлап отырмыз», – деді «Жальгирис» директоры Миндаугас Каспярунас.

Еске сала кетейік, 61 жастағы қазақстандық Владимир Чебурин өткен жылдың қыркүйегінде «Жальгириспен» қоштасқан болатын. Төрт маусым ішінде ол клубты үш рет чемпиондыққа жеткізіп, тағы екі рет Литва кубогын иеленді.