«Гуаль Сәтпаевтің орнын алмастыра алмайды деп айтқан жоқпын»: Антич «Қайрат» шабуылшысының «Челсиге» ауысуы туралы сөзін түсіндірді

Шымкенттік «Ордабасының» қорғаушысы Никола Антич ASnews.kz сайтына берген сұхбатында 17 жастағы қазақстандық шабуылшы Дастан Сәтпаевтың лондондық «Челсиге» ауысуына қатысты бұған дейін айтқан мәлімдемесін нақтылады.

«Гуаль Сәтпаевтің орнын алмастыра алмайды деп айтқан жоқпын. Марк – «ондық» позициядағы ойыншы, ал Сәтпаев – таза шабуылшы. Әрине, Сәтпаевтың кетуі – «Қайрат» үшін үлкен шығын, өйткені бәрібір де ойыншы «Челсиге» кетті ғой. Егер бізден Әмір кетсе, ол да біз үшін қиыншылық тудырар еді.

«Қайратқа» қарсы алғашқы матч пен кешегі ойынның арасында ешқандай айырмашылық сезілмейді. Команда ретінде олар өте жақсы. Бұрын қалай мықты болса, солай мықты болып қалды», – деді Антич.

Бұған дейін сербиялық Mozzart Sport басылымына берген сұхбатында Никола Антич алматылық клуб өз түлегіне тең келетін алмастырушы таба алмады деген пікір білдірген еді. «Ордабасы» легионерінің айтуынша, жаңадан келген испаниялық Марк Гуаль «ондық» позициясына жақынырақ ойнайды, ал Сәтпаев шабуыл шебінде тікелей, жылдам әрі агрессивті ойынымен ерекшеленетін. Соның салдарынан «Қайрат» әлсіреп қалғандай көрінген болатын.

Еске сала кетейік, «Қайрат» түлегі Дастан Сәтпаев қазіргі уақытта «Челси» сапында жүр, негізгі командамен бірге Аустралияда маусымалды дайындықтан өтуде және тамыз айында кәмелет жасына толған бойда ресми келісімшартқа отыруға дайындалып жатыр.

«Гуаль Сәтпаевтың орнын баса алмайды»: «Ордабасы» легионері Дастанның «Челсиге» ауысуы жайлы

Сәтпаевқа еріп Еуропаға кете ме? ҚПЛ-2026 маусымының басты таланты Жасұлан Әмір жайлы не білеміз?