«Қайсар» легионері:«Қайраттан» жеңілмеуіміз керек еді, бірақ төреші шешіп кетті

«Қайсардың» ресейлік қорғаушысы Амир Мохаммад ASnews.kz сайтына берген сұхбатында ҚПЛ-дың 20-турынан ауыстырылған «Қайратқа» қарсы матчтың (1:2) нәтижесі туралы пікір білдірді.

«Біз «Қайратқа» лайықты қарсылық көрсеттік, бірақ жеңілістің аты жеңіліс. Егер ұтылмағанымызда, мен шын мәнінде риза болар едім. Біз басқа нәтижеге лайық едік, бірақ төреші үш голымызды есептемей, басқаша шешім қабылдады. Меніңше, сол голдардың кем дегенде біреуін есепке алу керек еді.

Әбікеннің голына келсек, оны көргенде есеп теңескеніне қуанып, жеңісті жұлып алатынымызға сенімді болдым. Екіншіден, бұл шынымен де өте әдемі гол. Осы маусымда ҚПЛ-да мұндай голды әлі көрген жоқпын. Негізі Айбол жаттығуларда мұндай позициядан жиі соққы жасайды: оң аяғымен де, сол аяғымен де керемет тебеді», – деді легионер.

Сондай-ақ Мохаммад чемпионатта әлі бірде-бір жеңіске жетпеген қызылордалық клубтың жанкүйерлеріне үндеу жасады:

«Біз де уайымдап жүрміз. Команда қазіргі тұрған орнына лайық емес – мұнымен бәрі келіседі деп ойлаймын. Жанкүйерлер алдында ыңғайсыз, бірақ жақын арада жағдайды түзеп, жеңіске жетеміз деп үміттенемін. Бәрі де Жаратушының қалауымен», – деп қосты ол.

Кездесу барысында төреші Айдын Тасыбаев «Қайсардың» алматылықтар қақпасына соққан үш голын (7, 18 және 91-минуттарда) есепке алмады. Тоғыз ойынның қорытындысы бойынша Андрей Ферапонтовтың шәкірттері турнир кестесінде 13-орында тұр.

30 жастағы Амир Мохаммад командаға биылғы ақпанда қосылды. Махачкала тумасы бұған дейін ресейлік «Химки» мен «Балтикада» ойнаған. Ресей бірінші лигасының екі дүркін чемпионы.