«Ақтөбе» бапкері ҚПЛ-дағы логистика туралы: тек көзқарасымызды ғана өзгерте аламыз

«Ақтөбе» бас бапкері Штефан Таркович ASnews.kz сайтына берген сұхбатында ҚПЛ матчтары аясындағы қалалар арасындағы үлкен қашықтық пен ауыр жол жүру мәселелеріне қатысты пікір білдірді.

«Қазақстан, білуімше, әлемдегі ең үлкен тоғызыншы мемлекет. Және сіз мұны өзгерте алмайсыз. Әрине, логистика күрделі, әсіресе мұнда ойнауға келетін легионерлер бұған дайын болу керектігін түсінуі қажет, әйтпесе табысқа жету мүмкін емес.

Біз логистиканы өзгерте алмаймыз. Бірақ оған деген көзқарасымызды өзгерте аламыз. Осы сапарларға қалай көңіл-күйімізді баптап, қалай дайындалатынымызды өзгерте аламыз. Иә, бұл – проблема, бірақ екінші жағынан, барлық ойыншылар кәсіпқой және бұған бейімделе алады деп сенемін», – деп атап өтті словакиялық маман.

Еске салайық, ҚПЛ-дың алтыншы туры аясында «Ақтөбе» сырт алаңда елордалық «Жеңіске» 0:1 есебімен жол берді. Қазіргі таңда «ақ-қызылдардың» еншісінде жеті ұпай бар және олар турнир кестесінде оныншы орында тұр.

Айта кетейік, бұл Штефан Тарковичтің команда тізгініндегі алғашқы жеңілісі болды. Бұған дейін словакиялық маманның жетекшілігімен ақтөбеліктер чемпионат аясында «Ұлытаумен» тең түсіп, «Каспийді» жеңген болатын, сондай-ақ ел Кубогында «Арысты» тас-талқан етті.

«Сапа жетіспейді»: Таркович «Жеңістен» жеңілген ойын мен Нанидің бабы туралы