«Ақтөбе» вингері «Қайратқа» қарсы матч туралы: қарсыластың ойын стилі ұнамады

«Ақтөбенің» украиналық вингері Дмитрий Топалов алматылық «Қайратқа» қарсы (0:1) екінші турдағы ойын туралы айтып берді, деп хабарлайды ASnews.kz.

«Ойын алдында уайымдайтындай жас емеспін. Алаңға шыққанда кез келген қобалжу басылады. 2023 жылы «Реннге» қарсы алаңға шыққанымда, бұл менің еурододалардағы алғашқы ойыным болды. Сол кезде қатты уайымдадым. Еурокубоктік матчтардан кейін алаңға шығу жеңілірек. Алматыдағы атмосфера тамаша болды – біздің жанкүйерлеріміз де көп болды, «Қайрат» фанаттары да өз командасын жақсы қолдады. Бұл матч атмосфера жағынан еурокубоктер деңгейінде өтті», – деді Топалов.

Сондай-ақ футболшы «ақ-қызылдардың» бұрынғы бапкері Николай Костовтың философиясымен салыстыра отырып, алматылық клубтың тактикасын бағалады:

«Ойын жағынан маған «Қайраттың» стилі ұнамайды. Олар қарапайым ойнады – ештеңе ойлап таппады. Маған комбинациялық футбол көбірек ұнайды. Николай Костов командаға шабуылдаушы футболды, пас арқылы ойнауды үйрететін.

Дастан Сәтпаев алаңға шыққанда, жанкүйерлердің оны қалай қолдап жатқаны бірден естілді. Ол – жас әрі жылдам ойыншы. Сәтпаевтың өзі үшін бұл өте үлкен серпін. Физикалық тұрғыдан бұл ойын ауыр болды. Біз өте көп жүгірдік, ал ол тың күйде шықты. Егер Даниэль Соса қателеспегенде, Сәтпаев ештеңе істей алмас еді. Осындай сәттен кейін барлығы Сосаға қолдау көрсетті. Біз гол соға алар едік, мұндай жағдай болғанда өте өкінішті. Бірақ келесі ойында мұндай жағдай менде де, басқаларда да болуы мүмкін. Бүкіл команда оны қолдады», – деп қорытындылады ойыншы.

Естеріңізге сала кетейік, Топалов «Ақтөбеге» өткен маусымаралық үзілісте қосылып, «ақ-қызылдар» сапында төрт матч өткізді.

Төрт турдан кейін «Қайрат» 10 ұпаймен ҚПЛ турнирлік кестесінде көш бастап тұр. «Ақтөбе» төрт ұпаймен 11 орынға жайғасты.

Бұған дейін азиялық құраманың қақпашысы «Ақтөбенің» жаңа бапкері Штефан Тарковичтің ҚПЛ-дағы әлеуетін бағалады.