Азиялық құраманың қақпашысы: Таркович «Ақтөбеде» нәтижеге қол жеткізеді

Қырғызстан құрамасының қақпашысы әрі «Тұранның» бұрынғы ойыншысы Ержан Токотаев ASnews.kz сайтына берген сұхбатында «Ақтөбенің» жаңа бас бапкері Штефан Тарковичтің ҚПЛ-дағы мүмкіндіктерін бағалады.

«Жаңа клубта оған сәттілік тілеймін. Ұлттық құрамада онымен жұмыс істеу ұнады, тек жақсы әсерде қалдым. Таркович – тәжірибесі мол бапкер. Ол жігіттермен тез тіл табысып, «Ақтөбеде» алдына қойылған нәтижелерге қол жеткізе алады деп ойлаймын», – деді футболшы.

Айта кетейік, қақпашы Ержан Токотаев Штефан Тарковичтің жетекшілігімен Қырғызстан құрамасы сапында 15 матч өткізген.

Естеріңізге сала кетейік, 1 сәуірде «Ақтөбе» басшылығы 53 жастағы словакиялық маманды бас бапкер қызметіне тағайындағанын мәлімдеді. Бұл қызметте ол болгариялық Николай Костовты алмастырды. Тарковичпен келісімшарт осы жылдың соңына дейін жасалған.

Словакиялық маманның жетекшілігімен өткен алғашқы матчта «Ақтөбе» сырт алаңда «Ұлытаумен» тең түсті (1:1).