«Атыраудың» африкалық сұрмергені: «Ордабасымен» ойындағы төрешінің шешімі – қорлық

«Атыраудың» бұрынғы шабуылшысы Нсунгуси Эффионг ASnews.kz сайтына берген сұхбатында «Ордабасыға» қарсы өткен атышулы матчтың (1:1) нәтижесіне қатысты пікір білдірді.

«Голдың неліктен саналмағаны түсініксіз. Одан да сорақысы, капитан команда атынан наразылық білдірген кезде төрешінің оны алаңнан қуып жіберуі – нағыз қорлық. Реферимен көшбасшы сөйлеспегенде, кім сөйлеседі?».

Сонымен қатар, Эффионг маусым басталар алдында Қазақстан Премьер-лигасына оралу мүмкіндігі туралы айтып берді.

«Соңғы кездері қазақстандық клубтармен келіссөздер жүргізген жоқпын, бірақ ол кезеңді жылы жымиыспен еске аламын», – деді нигериялық ойыншы.

Естеріңізге сала кетейік, ойынның 90-минутында VAR жүйесін көргеннен кейін бас төреші Санжар Ысқақов «мұнайшылардың» басымдығын арттырған Константин Дорофеевтің голын санамау туралы шешім қабылдады. Содан кейін Ринат Жұматовты алаңнан қуды. Қосымша уақытта Елхан Астанов пенальтиді сәтті орындап, матчқа нүкте қойды. Осылайша «Ордабасы» өз алаңындағы жеңілістен аман қалды.

2023 жылы Эффионг «Атырау» сапында өнер көрсеткен. Оның еншісінде тоғыз гол және үш нәтижелі пас бар. Қазіргі таңда 26 жастағы форвард үндістандық «Пенджаб» клубында ойнайды.