Донецкілік «Шахтердің» бұрынғы ойыншысы «Ақтөбеге» ауысу туралы: олар менің жарты жыл ойнамағанымнан қорықты

Украиналық жартылай қорғаушы Дмитрий Топалов ASnews.kz сайтына берген сұхбатында «Ақтөбеге» ауысуының мән-жайымен бөлісті.

«Агент қоңырау шалып, Қазақстаннан ұсыныс бар екенін айтты. «Ақтөбе» басшылығы қызығушылық танытты, бірақ олар менің жарты жыл ойнамағанымнан қорықты. Донецкілік «Шахтермен» келісімшартым болды, бірақ белгілі бір себептермен еркін агент ретінде кеткім келді. Жалға берілгім келмегендіктен клуб табу қиын болды, мен толыққанды трансфер рәсімдегім келді. Агентпен сөйлескеннен кейін бір апта өтті, олардың қызығушылығы жоғалды деп ойладым.

Кейін «Ақтөбемен» келісімшартта отырған және команданың оқу-жаттығу жиынында жүрген Иван Ордец қоңырау шалды. Оның айтуынша, Николай Костов оған келіп, менің қабілеттерім туралы сұрапты. Иван мені бала кезімнен біледі, ол маған жақсы мінездеме берді. Осыдан екі күн өткен соң агент маған клубтың түпкілікті шешім қабылдап, менімен келісімшартқа отыруға дайын екенін жеткізді. Агент басында «Ақтөбе» туралы айтқанда, мен бірден қала, стадиондағы атмосфера және жанкүйерлер туралы біле бастадым. Иван ол кезде командада болғандықтан, агент Қазақстандағы басқа да нұсқаларды ұсынғанына қарамастан, мен нақ осы «Ақтөбеге» ауысқым келді», – деді Топалов.

Қазақстанға келгенге дейін вингер донецктік «Шахтер», ЛНЗ (Черкассы), «Мариуполь» және ковалевкалық «Колос» сапында өнер көрсеткен.

Топаловтың трансферлік құны 500 мың еуроға бағаланады. Украиналық ойыншы чемпионаттың алғашқы үш турында «Ақтөбе» сапында үш матч өткізді.

Айта кетейік, алғашқы үш турдан кейін «Ақтөбе» басшылығы болгариялық маман Николай Костовты қызметінен босату туралы шешім қабылдады. 1 сәуірде клуб 53 жастағы словакиялық маман Штефан Тарковичтің бас бапкер қызметіне тағайындалғанын мәлімдеді.

Бұған дейін Қырғызстан ұлттық құрамасының шабуылшысы Жоэль Кожо «Ақтөбенің» жаңа бапкерімен бірге жұмыс істеу тәжірибесі туралы пікір білдірді.