«Крылья Советовтің» экс-ойыншысы: Адиев РПЛ маусымын соңына дейін аяқтауы тиіс

«Крылья Советов» клубының бұрынғы футболшысы әрі бас директорының орынбасары Зураб Циклаури ASnews.kz порталына берген сұхбатында Магомед Адиевтің қызметінен кетуі мүмкін деген ақпаратқа қатысты пікір білдірді.

«Менің білуімше, Адиевпен келісімшартты үзу туралы сөз қозғалып жатқан жоқ. Басшылыққа оның Қазақстанға сапары ұнады ма, жоқ па – маңызды емес, ортада еңбек қатынастары бар. Бұл «Крылья»тарапынан эмоцияға беріліп қабылданған шешім болар еді. Чемпионаттың аяқталуына екі ай қалғанда қайта құру жұмыстарын бастаудың қандай мәні бар?

Әзірге команда түбегейлі өзгерістер жасайтын жағдайда емес. Меніңше, бапкер мен басқарма маусымды бірлесе отырып соңына дейін атқарып, РПЛ-дағы орнын сақтап қалуға тырысуы керек», – деді 51 жастағы ресейлік маман.

Еске салайық, ресейлік БАҚ мәліметінше, Қазақстан құрамасының бұрынғы тәлімгері Магомед Адиев самаралық клубтан кетуі мүмкін. Бір апта бұрын ол Астанада «Ақтөбе» өкілдерімен келіссөздер жүргізген болатын.

22 турдан кейін «Крылья Советов» РПЛ-да 13-орында келеді. Қаңтар айында командаға елордалық ұжымның экс-шабуылшысы Джеффри Чинеду қосылған еді.