Қырғызстан құрамасының қорғаушысы: Тарковичке «Ақтөбеде» әлдеқайда жеңіл болады

Қырғызстан құрамасы мен индонезиялық «Персита» клубының қорғаушысы Тамирлан Козубаев ASnews.kz тілшісіне берген сұхбатында «Ақтөбенің» жаңа бапкері Штефан Таркович туралы пікір білдірді.

Козубаев ұлттық құрама сапында Тарковичтің жетекшілігімен 17 матч өткізген. Футболшының айтуынша, еуропалық бапкердің Азияға бейімделу кезеңі қиындықсыз өткен жоқ, дегенмен қорытынды нәтиже бәрін көрсетіп тұр:

«Бапкер Штефан Тарковичке келер болсақ, бұл жақсы тәжірибе болды. Меніңше, оған басында қиынға соқты: барлық ойыншыларды қарап шығу, өз стилін табу, менталитетке және жалпы Азияға бейімделу қажет болды. Сондықтан бастапқыда нәтижелер мәз болған жоқ. Бірақ, жалпы алғанда, ол Қырғызстанды әлем чемпионаты іріктеуінің келесі кезеңіне шығарып, өз міндетін орындады деп ойлаймын», – деді футболшы.

Словакиялық маманның ҚПЛ-дағы болашағы туралы сөз қозғаған Козубаев, көрші елдегі жұмыс тәжірибесі оған Қазақстанда қатты көмектесетініне сенімді:

«Қазақстанда оған енді аса қиын болмайды деп ойлаймын. Жұмысының соңына қарай ол біздің менталитетімізді және бізбен қалай жұмыс істеу керектігін шамамен түсініп қалды. Немесе біз оған және оның жұмыс тәсіліне бейімделіп кеттік», – деп мәлімдеді Козубаев.

Тамирлан Козубаев 2021 жылғы маусымның екінші жартысында түркістандық «Тұран» сапында өнер көрсетіп, бір матч өткізген. Жалпы, Қырғызстан ұлттық құрамасы үшін қорғаушы 63 ойынға қатысып, үш гол соққан.

Еуро-2020 қаһарманы және Қырғызстандағы сәтсіздік: «Ақтөбені» жаттықтыратын Таркович кім?

Қырғызстандық журналист Таркович туралы: «Ақтөбе» оған шыдап отырмайды