Қырғызстандық журналист Таркович туралы: «Ақтөбе» оған шыдап отырмайды

Спорт журналисі Теңгелбес Мұсаев ASnews.kz порталына берген сұхбатында «Ақтөбеге» тағайындалуға жақын жүрген Штефан Тарковичтің Қырғызстандағы мансабын қорытындылады.

«Егер оның Қырғызстандағы жұмысын бағалайтын болсақ, екі негізгі факторды атап өтуге болады. Бір жағынан – Азия кубогындағы сәтсіздік. Екінші жағынан – 2026 жылғы әлем чемпионаты іріктеу кезеңінің III раундына тарихи жолдама алу. Дегенмен, топтағы қарсыластарымыз (Оман, Малайзия, Қытай Тайбэйі) жағынан да, квотаның артуы жағынан да (бұрын топтан тек бір команда шықса, қазір екеу) жолымыз болғанын ұмытпауымыз керек», – деді ол.

53 жастағы словакиялық маманның ҚПЛ-дағы болашағы туралы сөз қозғаған Мұсаев, оның Қазақстанға бейімделуі жеңілірек өтуі тиіс екенін, алайда күнделікті клубтық жұмыстың ерекшелігі мен «ақ-қызылдардың» амбициясы ол үшін үлкен сынақ болуы мүмкін екенін атап өтті:

«Қырғызстандағы жұмысынан кейін оған әлдеқайда жеңіл болатыны анық. Белгілі бір түсінігі қалыптасты, тиісті қорытындылар да жасалған шығар. Бірақ бұл жұмысқа қаншалықты сіңісіп кете алады, мәселе сонда. Клуб – ұлттық құрама емес. Дайындалып, «бой жазуға» уақыт болмайды, ал «Ақтөбе», меніңше, күтіп, шыдап отыратын клубтардың қатарынан емес», – деп мәлімдеді сарапшы.

Еске салайық, болгариялық маман Николай Костов екі тараптың келісімі бойынша «Ақтөбе» бас бапкері қызметінен ресми түрде кеткен болатын.

Қазіргі таңда словак Штефан Таркович клубпен келіссөздердің шешуші кезеңінде тұр. Оның соңғы жұмыс орны Қырғызстан құрамасы болған (2023 жылдың сәуірінен 2024 жылдың маусымына дейін).

Еуро-2020 қаһарманы және Қырғызстандағы сәтсіздік: «Ақтөбені» баптауы мүмкін Таркович жайлы не білеміз?