Рамазан Оразовтың жұбайы: Данияда Қазақстанға қарағанда аз жалақы береді

Қазақстан құрамасы мен даниялық «Силькеборгтың» жартылай қорғаушысы Рамазан Оразовтың жұбайы BorodAbata.kz сайтына берген сұхбатында Даниядағы өмірі жайлы айтып берді. 

– Рамазан «Силькеборг» клубына ауысатын кезде сізбен ақылдасты ма?

– Негізінде «Силькеборг» біраздан бері Рамазанға қызығып жүрді. Оны өз клубтарында көргісі келді, әсіресе бас бапкері. Рамазанды көп күтті, командасының бір бөлігі болғанын қалады. Біз сол кезде клуб және ел туралы ақпарат жинай бастадық. Барлығы көңілімізден шықты. Клуб та, чемпионат та жақсы деңгейде. Өткен жылы «Силькеборг» ел кубогын жеңіп алды. Осы факторлардың барлығын ескеріп, Данияға көшу туралы шешім қабылдадық.

– Бұл елге бейімделу қиын болмады ма? Себебі Дания Словенияға қарағанда суықтау және қымбат елдердің бірі.

– Дания Еуропадағы ең қымбат мемлекеттердің бірі. Өмір сүру деңгейі де жақсы. Бізге ұнайды. Словениямен салыстарғанда ерекшеліктері бар, әрине. Бірақ ол жақта да өмір сүру оңай болмады. Данияда барлығы жоғары деңгейде. Климатына келсек, қатты тоңбадық. Біз бұған шешім қабылдар кезде ең соңында ғана назар аудардық. Бәрінен бұрын клубқа мән бердік. 

– Мұнда футболшыларға Қазақстанға қарағанда аз ақша төлейді. Өмір сүру қиынға соқпады ма?

– Әрине, мұнда Қазақстанға қарағанда аз жалақы ұсынады. Бірақ бұл Еуропа ғой. Орташа жалақы мөлшері Қазақстанға қарағанда әлдеқайда жоғары. Сондықтан өзімізді шектеп қалатын сәттер болмайды. 

27 жастағы футболшы 2024 жылдың жазынан бері «Силькеборг» клубында өнер көрсетуде.