Талғат Байсуфинов – Сәтпаев туралы: енді оны жастар құрамасына жібермейміз

Қазақстан ұлттық құрамасының бас бапкері Талғат Байсуфинов шабуылшы Дастан Сәтпаевтың жарақатына қатысты түсініктеме берді, деп хабарлайды ASnews.kz.

«Мен бұл мәселеге қатты араласқан жоқпын. «Қайрат» клубының басшылығымен түсініспеушілік болды, сондықтан Сәтпаевтың жағдайы бойынша тікелей «Челси» клубының басшылығымен байланысқа шығуды жөн көрдік. Бұған дейін де осы тақырыпта сұхбат беріп, кеңірек түсіндірген едім.

Бастапқыда жолдастық матчтардың орнына оны U-21 құрамасының ресми ойындарына қатыстыру туралы ой болған. Алайда біз басқа нәрсені байқадық. Мысалы, Грузия құрамасының ойыншысы Хвича Кварацхелияны алайық: оларда ірі турнир – жастар арасындағы Еуропа чемпионаты болған кезде де, оны U-21 құрамасына түсірмей, тек негізгі құрамда ойнатты. Қазіргі әлемдік футболдағы үрдіс осындай. Жас ойыншыны қайтадан жастар құрамасына жіберу оның дамуына кері әсер етуі мүмкін.

Сәтпаев осы жасында-ақ жоғары деңгей көрсетіп жүр, ал ұлттық құрамадағы ойындар оған үлкен тәжірибе береді. Жастар және жасөспірімдер құрамасына қайта оралуы өзіне кері әсер етуі мүмкін. Сондықтан біз оны енді тек ұлттық құрамада ғана ойнатамыз», – деді Байсуфинов.

Бұған дейін Талғат Байсуфинов Дастан Сәтпаевтың наурыз айындағы ойындарға шақырылмауын медициналық себептермен байланыстырған еді. Оның айтуынша, бапкерлер штабы лондондық «Челси» клубының дәрігерлерінен ойыншының жағдайы мен халықаралық үзіліс кезінде қалпына келуі қажет екені туралы ұсыныстар алған. Бұл мәліметтер Қазақстан құрамасының медициналық штабымен талқыланып, футболшыға толыққанды демалыс беру туралы шешім қабылданған.

Қазақстан мен Намибия арасындағы матч 25 наурыз күні «Астана Арена» стадионында өтеді. Ойын 17:00-де басталады.