Камара «Астана» туралы: жаман сөз айтқым келмейді – клубқа сәттілік тілеймін

Қытайлық «Гуандун» шабуылшысы Усман Камара ASnews.kz сайтына берген сұхбатында «Астананың» соңғы ойындарына қатысты пікір білдірді.

«Мен «Астананың» ойындарын әлі де бақылап жүрмін және олардың жеңіске жетіп жатқанына қуаныштымын. Командаға шын жүректен сәттілік тілеймін. Білесіз бе, мен кеткеннен кейін қарғап-сілеп немесе жаман сөз айтатындардың қатарынан емеспін. Бұл клуб маусымды сәтті өткізсін, ал Алла тағала оларға дағдарыстан шығуға көмектессін», – деді африкалық ойыншы.

Сонымен қатар, Камара Қытай мен Қазақстан футболының айырмашылығы туралы сұраққа да жауап берді:

«Біреулерге Қытай чемпионаты әлсіз болып көрінуі мүмкін, бірақ мұнда қарсылық деңгейі шынымен де жоғары. Бұл алаңға шыққан бойда бірден байқалады. Ал қай елдің клубтары мықтырақ екенін салыстыра алмаймын – жай ғана өз ойыныммен көрермендерді қуантқым келеді», – деп қосты ол.

Еске салайық, желтоқсан айында гвинеялық вингер Усман Камара жалақының уақытылы төленбеуіне байланысты елордалық клубпен қоштасқан болатын. Қазіргі таңда ол Қытайдың екінші дивизионында өнер көрсетеді.

ҚПЛ-дың алғашқы үш турында Григорий Бабаянның командасы алты гол соғып, соның ішінде «Тобылды» да (2:0) ұтты. Ал Камараның орнын 18 жастағы клуб түлегі Мақсат Абраев басты.