Жұмасқалиев – «Жетісумен» болған ойын жайлы: «Тобылдың» әр ойында гол жіберіп жатқаны алаңдатады

«Тобыл» клубының бас бапкері Нұрбол Жұмаскалиев Қазақстан Премьер-лигасының екінші турында «Жетісумен» болған (2:2) матчқа баға берді, деп хабарлайды ASnews.kz.

«Папа (Ндиайе) жарақат алды – өкінішке қарай, ол ойынға қатысатын ойыншылардың тізімінде болмады. Қорғаныстағы ойынға келсек, мен бұл туралы жігіттерге айттым: бұл мені қанағаттандырмайды. Қайтадан ойынымызды жақсартып, жаңа бір нәрсе ойлап табуымыз керек. «Тобылдың» әр ойында гол жіберіп жатқаны алаңдатады.

Герраның негізгі құрамда болмауы ма? Бұл – менің шешімім. Менің ойымша, Урош (Милованович) пен Жасұлан (Жұмашев) көбірек қысым жасап, қарқын қосады. Олар тапсырманы орындап, екі гол соқты», – деді маман.

Жұмаскалиев жақын арада сербиялық шабуылшының нәтижелілігі арта түсетінін атап өтті:

«Оның шабуылшы ретіндегі ойынына оң баға беремін. Милованович әлі де қосады деп ойлаймын – оның жеке нәтижелері де, команданың жеңістері де алда».

Қақпада Устименко мен Бусурмановтың кезектесіп ойнауына қатысты былай деді:

«Біз әр ойынға қарай шешім қабылдаймыз: матчқа аз уақыт қалғанда кім негізгі құрамда шығатынын анықтаймыз. Бақытымызға қарай, командада бірдей деңгейдегі ойыншылар бар. Бұл Данил мен Сұлтанға босаңсуға жол бермейді».

Матчтың соңғы минуттарында «Жетісу» есепті теңестіріп, «Тобылдан» ұпай жұлып алды. Алғашқы екі турда команда өз қақпасына алты гол жіберді.