«Ақтөбенің» бапкері – Нанидің бабы туралы: оның 70 пайызының өзі команда үшін керемет күш

«Ақтөбенің» бас бапкері Николай Костов «Қайраттан» жеңілгеннен кейінгі (0:1) баспасөз мәслихатында команданың жаңа ойыншысы Луиш Нанидің физикалық жағдайына қатысты пікір білдірді, деп хабарлайды ASnews.kz.

«Агустин Пасторицаның алаңға кеш шығуы ма? Ол біздің негізгі ойыншымыз, бірақ бұл оның жарақаттан кейінгі алғашқы ойыны еді. Біз Пибемен матч алдында сөйлесіп, оның денсаулығын қатерге тікпеуге және негізгі құрамда шығармауға келістік. Наниге келер болсақ, ол әр жаттығу сайын, күн санап физикалық тұрғыдан күшейіп келеді. Егер ол дайын болып, өзін жақсы сезінсе, онда негізгі құрамда шыға бастайды. Иә, ол көп уақыт өткізіп алды, бірақ Луиш мықты ойыншы. Біз оның қатарымызда болғанына өте қуаныштымыз, ол ойыншыларды да, бапкерлерді де, әкімшілікті де энергиямен қуаттандырады. Біз оның отбасымызға қосылғанына қуаныштымыз. «Қайратпен» өтетін матчтың маңыздылығына келсек, сөзсіз, Луиш бұл туралы өте жақсы біледі. Егер ол өз әлеуетінің 70 пайызын көрсетсе де, бұл біздің командамыз үшін керемет күшейту болады», – деді Костов.

Еске салайық, ҚПЛ-2026 екінші турының орталық матчында «Ақтөбе» сырт алаңда алматылық «Қайратқа» (0:1) минималды есеппен жол берді. Ақтөбеліктер келесі матчын өз алаңында семейлік «Елімайға» қарсы өткізеді.

«Қайрат» алты ұпай жинап, ҚПЛ-2026 турнир кестесінде жеке-дара көш бастады. Келесі турда (21 наурыз) алматылықтар «Жетісуға» қарсы ойнайды.

Бұған дейін «Ақтөбенің» экс-қақпашысы «ақ-қызылдар» футболшысының гол жіберіп алуға әкеп соққан қателігін талдаған болатын.