«Ақтөбенің» экс-қақпашысы – Сосаның «Қайратқа» қарсы ойындағы қателігі туралы: жауапкершілікпен әрекет ету керек

«Ақтөбенің» экс-қақпашысы Самат Отарбаев ASnews.kz сайтына берген сұхбатында ҚПЛ-2026 екінші турындағы «ақ-қызылдардың» «Қайратқа» қарсы ойынына (0:1) баға берді.

«Ойынның тек екінші таймын көре алдым. Матч соңында кәдімгідей тартыс болды, Заруцкийдің қақпасына біраз шабуылдар мен соққылар жасалды. Анарбековтің қақпасына да қысым түсті. Бірақ Дастан бәрібір де өзінікін дәлелдеді. «Ақтөбеге» жанкүйерлік етсем де, Дастан ойынның нүктесін қойды. Ол алаңға тыңнан қосылды, допты Сосадан тартып алып, гол соқты. Соса Дастанға қарағанда тәжірибелі, бірақ қателік жіберді – мұндай деңгейдегі осындай сәттерде, әсіресе қысым кезінде үлкен жауапкершілікпен әрекет ету керек. Бұл Сосаның нәтижелі қателігі деуге болады.

Нани шықты, стадионды біраз шайқады. 20 минут ойнаса да, деңгейі бөлек екені көрінді. Әрине, бұрынғыдай емес, бірақ оның топ-деңгейі сезіліп тұр. Бір-екі рет допты жоғалтты, бірақ басқа жағынан алғанда, Нанидің аты – Нани. Бәрі оның шығуын күткен шығар. Тіпті менің достарым да осы ойынға билет іздеп, таба алмай жатты. Жанкүйерлердің көбісі Наниді көруге барған болар. Ойын өте қызық болды. Менің ойымша, есеп заңды – екінші таймда «Қайрат» өз мүмкіндігін мүлт жібермеді. Рафаэль Уразбахтин Сәтпаевты уақытында шығарды, ал Дастан өз деңгейін дәлелдеді. Заруцкий де өзін жақсы қырынан көрсетіп, біраз соққыны қайтарды. Оның да мотивациясы жоғары болғаны түсінікті», – деді Отарбаев.

Еске салайық, Алматыда өткен кездесу 1:0 есебімен алаң иелерінің пайдасына аяқталды. 76-минутқа дейін таблода нөлдік теңдік сақталды. Ойын тағдырын 64-минутта алаңға шыққан Дастан Сәтпаев шешті. 12 минуттан соң ол Даниэль Сосадан допты тартып алып, бұрынғы командаласы Александр Заруцкийден айласын асырды.

«Қайрат» алты ұпай жинап, ҚПЛ-2026 турнир кестесінде жеке-дара көш бастады. Келесі турда (21 наурыз) алматылықтар «Жетісуға» қарсы ойнайды, ал «Ақтөбе» (үш ұпай) өз алаңында «Елімайды» қабылдайды.

Айта кетейік, қазіргі таңда 36 жастағы Отарбаев ҚХР Шыңжаң-Ұйғыр автономиялық ауданының жасөспірімдер командаларында қақпашылар бапкері қызметін атқарады.