«Тобыл» ойыншысының агенті: Герраның мақсаты – Венесуэла құрамасына шақырту алу

«Тобыл» клубының вингері Луис Герраның агенті Даниэль Мендес ASnews.kz сайтына берген сұхбатында венесуэлалық футболшының Қазақстан Суперкубогындағы дебюті жайлы пікір білдірді.

«Қайратты» жеңу бізге үлкен серпін берді. Оның үстіне Луистің голы ойын тағдырын шешуде маңызды рөл атқарды. Енді чемпионат басталар алдында өщіне деген сенімділігі бұрынғыдан да арта түсті. «Тобыл» оны команданың жаңа көшбасшыларының бірі ретінде көріп отыр.

Құдай қаласа, Венесуэла құрамасының бас бапкері Луистің «Тобылдағы» прогресін назардан тыс қалдырмайды деп үміттенемін. Жақын арада ол халықаралық деңгейде өз елінің намысын қорғап, ұлттық құрамаға пайдасын тигізеді деп сенемін», – деді агент.

«Тобылдың» жаңа ойыншысы Луис Герра «Қайратқа» қарсы өткен Суперкубок матчында есеп ашқан болатын. Негізгі уақыт тең аяқталып, костанайлық клуб пенальти сериясында 5:4 есебімен жеңіске жетті.

Кезінде Либертадорес кубогына қатысқан футболшы алғаш рет Латын Америкасынан тыс жерге шығып отыр. Оның соңғы клубы чилилік «Лимаче» болған.

29 жастағы вингер бұған дейін Венесуэла құрамасында ойнамаған. Қазіргі таңда бұл құраманың жалпы құны шамамен 72,35 миллион еуроға бағаланып отыр.