«Астананың» экс-легионері – клубтағы дағдарыс жайлы: оларға жаңа президент керек

«Астана» және Конго ДР құрамасының бұрынғы шабуылшысы Фирмин Мубеле ASnews.kz сайтына берген сұхбатында елордалық клубқа дағдарыстан шығу үшін басшылықты ауыстыру қажет екенін айтты.

«Мен үшін «Астана» әлі де ең жоғары деңгейде ойнауға болатын топ-клуб болып қала береді. Соңғы жылдары команданы онша жіті бақыламағаныммен, қазір оларға ең алдымен білікті президент керек екенін түсінемін», – деді африкалық футболшы.

31 жастағы шабуылшы не себепті ҚПЛ-дс өзін толық көрсете алмағанын да түсіндірді:

«Командадағы әріптестеріммен және бапкерлермен қарым-қатынасым өте жақсы болды. Бұл үлкен әрі жүйелі жоба еді: жалақы кешіктірілмеді, сыйақыға байланысты да мәселе болған жоқ. Ал дұрыс ойнауыма жарақат кедергі келтірді – сол жақ тізем әлі күнге дейін ауырады», – деп қосты ол.

2019 жылы «Астана» Мубелені Францияның «Тулуза» клубынан жалға алған болатын. Сол маусымда конголық футболшы 12 матч өткізіп, небәрі екі нәтижелі әрекетпен көзге түсті. Ол кезде Фирминнің трансферлік құны 2,5 миллион еуроға бағаланған еді.

Өткен жылдың шілде айынан бері ойыншы еркін агент мәртебесінде жүр. Бұған дейін ол катарлық «Аль-Ахли» мен франциялық «Ренн» клубтарында өнер көрсеткен.