«Тулузаның» экс-футболшысы – «Астанадағы» жалақысы туралы: қыруар ақша алған жоқпын

«Астана» мен Конго ДР ұлттық құрамасының бұрынғы шабуылшысы Фирмин Мубеле ASnews.kz сайтына берген сұхбатында ҚПЛ-да Францияның 1-лигасына қарағанда аз табыс тапқанын мойындады.

«Мен «Тулузада» қалғым келмеді, өйткені бапкер үнемі жанжал шығара беретін. Чемпиондар лигасы мен Еуропа лигасында тәжірибе жинау үшін «Астананы» таңдадым. Мәселе ақшада емес еді – Францияда маған көбірек төлейтін», – деді Мубеле.

Сонымен қатар, ойыншы Қазақстан премьер-лигасына атақты легионерлердің келуіне қатысты пікір білдірді:

«Егер Нани мен Мозес 36 және одан жоғары жаста жақсы бабын сақтап жүрсе, олармен неге келісімшартқа отырмасқа? Мен агенттердің орнында болсам, Қазақстанға тағы бірнеше топ-футболшы әкелер едім», – деп қосты ол.

Еске салайық, 31 жастағы конголық шабуылшы 2019 жылы франциялық «Тулузадан» «Астанаға» ауысқан болатын. Еурокубок аясындағы жеті матчта Мубеле бірде-бір гол соқпады, ал кейін тізе жарақатына байланысты қатардан шығып қалды.