Струмия ҚПЛ-ға оралуы туралы: «Ақтөбе» мені қабылдамады – жанкүйерлер мұны түсінуі тиіс

«Каспий» жартылай қорғаушысы Леонель Струмия ASnews.kz сайтына берген сұхбатында «Ақтөбеден» кейін ҚПЛ-дың басқа клубына ауысып, неліктен уәдесін бұзғанын айтып берді.

«Кейбір «Ақтөбе» жанкүйерлерінің неліктен қатты ренжігенін түсінемін, бірақ мен ешқашан оларға құрметсіздік танытпас едім. Оларға деген жылы көзқарасым еш өзгермейді. Бірге өткізген жылдар мансабымдағы ең бақытты кезең болды. Алайда адамдар біле бермейтін көптеген дүниелер бар.

Мәселен, мен «Ақтөбенің» ойыншысы емес екенімді инстаграмдағы жазбадан кейін ғана білдім. Оның үстіне, дәл сол кезде біз ел Кубогын жеңіп алған едік. Бұл – футбол, бірақ маған өте ауыр тиді», – деп түсіндірді аргентиналық.

Струмияның айтуынша, «ақ-қызылдардың» экс-бапкері оның трансферіне тосқауыл қойған:

«Тіпті одан кейін де қайтып оралғым келді – бұл сөздер БАҚ беттерінде де жазылды. Бірақ «Ақтөбеден» көптен күткен қоңырау сол күйі шалынбады. Ол бапкер маған сенбеді. Ал мен өзім әлі де жақсы көретін клуб туралы ешқашан жаман нәрсе айтпас едім және өзіме қатысты кез-келген шешімді қабылдаймын.

Бүгін маған басқа команданың намысын қорғау мәртебесі бұйырды және мен оған бар күшімді саламын. Дегенмен, «ақ-қызылдарға» деген махаббатым ерекше және ол мәңгілікке қалады», – деп қосты 33 жастағы футболшы.

Өткен жылы «Ақтөбенің» экс-капитаны черногориялық «Будучность» сапында өнер көрсетті. Сондай-ақ кипрлік АЕЛ үшін ойнап, 11 матчта бір гол соқты. Оның трансферлік құны 200 мың еуроға бағаланып отыр.

«Каспий» «ақ-қызылдардың» тағы бір экс-ойыншысы Идрис Умаевпен келісімшартқа отырды. Шабуылшының еншісінде ҚПЛ-да соғылған 13 гол мен 12 ассист бар.